Garaşsyz Döwletleriň Arkalaşygynyň Synçylar toparynyň ýolbaşçysy, GDA-nyň Ýerine ýetiriji komitetiniň Başlygynyň — Ýerine ýetiriji sekretarynyň birinji orunbasary Leonid Anfimow Prezident saýlawlarynyň guramaçylygyna ýokary baha berdi.

Mälim bolşy ýaly, ýurdumyzda geçirilýän Prezidenti saýlawlaryna GDA bilen bir hatarda Türki Döwletleriň Guramasy we beýleki halkara guramalaryň synçylar topary saýlawyň geçiriliş ýagdaýyna syn edýärler.

GDA-nyň synçylar toparynyň ýolbaşçysy Leonid Anfimow S.A. Nyýazow adyndaky Türkmen oba hojalyk uniwersitetindäki saýlaw uçastogynda daşary ýurtly žurnalistler bilen söhbetdeş boldy. Anfimow şol söhbetdeşligiň barşynda Türkmenistanda geçirilýän Prezident saýlawlarynyň demokratiýa, aç-açanlyk we saýlawçylaryň islegini beýan etmek şertlerinde geçirilýändigini belledi.

GDA-nyň Ýerine ýetiriji komitetiniň Başlygynyň — Ýerine ýetiriji sekretarynyň birinji orunbasary Leonid Anfimow GDA-nyň synçylar toparynyň 2 hepdä golaý wagtdan bäri saýlaw bilen baglanyşykly çärelere gatnaşyp gelýändigini mälim etdi. Synçylaryň onlarça saýlaw uçastoklarynda bolandyklaryny, saýlaw möwsüminiň ýokary derejede gurnalandygyny, saýlawlaryň ýurduň saýlawçylarynyň ýokary raýat jogapkärçiligi esasynda geçirilýändigini belläp geçdi.

Anfimow Türkmenistanyň Prezidenti Gurbanguly Berdimuhamedowyň saýlawlarda ses berýän pursatlarynyň şaýady bolandygyny belläp, Türkmenistanyň Prezidentiniň öz ejesine bolan mähirli hem-de mylaýym garaýşynyň özünde uly täsir galdyrandygyny belledi.

Şeýle hem ol saýlawçylaryň baýramçylyk derejesinde geçirilýän saýlawlara gatnaşmagy we özüniň mynasyp gören dalaşgärine ses bermek üçin ähli şertleriň döredilendigini belledi.

Mundan başga-da, halkara synçylar Şanhaý Hyzmatdaşlyk Guramasyndan, Yslam Hyzmatdaşlyk Guramasyndan, Türki Döwletleriň Guramasyndan we daşary ýurt döwletlerinden hem çagyryldy.

Şirmuhammet Batyrow

Türkmen döwlet-binagärlik gurluşyk institutynyň

Ýol gurluşygy fakultetiniň 2-nji ýyl talyby.

DEGIŞLI MAKALALAR:AWTORYŇ BEÝLEKI MAKALALARY: