RU
Ata Watanymyzyň halk hojalygyny döwrebaplaşdyrmakdan, diwersifikasiýa ýoly bilen ösdürmekden ugur alnyp durmuşa geçirilýän köpugurly özgertmeleriň netijesinde, binýady berkarar döwletimiziň ykdysady kuwwaty barha berkeýär. Berkarar döwletiň täze eýýamynyň Galkynyşy döwrüne gadam basan ýurdumyzyň ähli ulgamlarynda ösüşiň täze belentliklerine galmak, rowaçlygyň täze sepgitlerine ýetmek göz öňünde tutulýar.
Ata Watanymyzyň geljek 30 ýylda gülläp ösmegine gönükdirilen «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» aýdyň beýan edilýän çäreler ýurdumyzyň ykdysady ulgamynda döwrebap özgerişleri amala aşyrmaklyga giň mümkinçilik döreder. Maksatnamada öňdebaryjy tehnologiýalaryň önümçilige ornaşdyrylmagyna, innowasion häsiýetli täze ykdysady gatnaşyklaryň emele getirilmegine möhüm ähmiýet berilýär.
Häzirki wagtda sanly ykdysadyýeti ösdürmek boýunça konsepsiýa laýyklykda, ýurdumyzda bäsdeşlige ukyply, maglumat-aragatnaşyk tehnologiýalaryna daýanýan ösen ykdysadyýet kemala getirilýär. Tapgyrlaýyn esasda durmuşa ornaşdyrylýan sanly ykdysadyýet hakyndaky konsepsiýa ýurdumyzyň önümçilik kuwwatynyň depginli ösüşini täze belent sepgitlere çykarmaga mümkinçilik berýär.
«Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy» maglumat tehnologiýalaryny ulanmagyň hasabyna ykdysadyýetiň ähli pudaklarynyň we ýurdumyzyň jemgyýetçilik edaralarynyň işiniň netijeliligini ýokarlandyrmaga gönükdirilendir. Konsepsiýada ministrlikleriň, pudaklaýyn dolandyryş edaralarynyň, Aşgabat şäheriniň hem-de welaýatlaryň häkimlikleriniň, eýeçiliginiň görnüşine garamazdan, edaralaryň, kärhanalaryň we guramalaryň sanly ykdysadyýete geçiş tapgyrlary kesgitlenilendir.
Sanlylaşdyrmak — milli ykdysadyýetimiz üçin hil taýdan täze tapgyr bolup, hormatly Prezidentimiziň baştutanlygynda amala aşyrylýan ýurdumyzy durmuş-ykdysady taýdan ösdürmegiň döwlet syýasatynyň, milli strategiýamyzyň esasy ugurlarynyň biri hasaplanylýar. Ykdysadyýetiň ähli ulgamlaryna sanly tehnologiýalaryň işjeň ornaşdyrylmagy ykdysady ösüşiň durnukly depginini üpjün etmek bilen çäklenmän, degişli şertleriň üýtgemegine uýgunlaşmagy, ykdysady töwekgelçilikleriň azalmagyny üpjün edýär. Umuman, ýurdumyzyň halk hojalygynyň giň gerimde sanlylaşdyrylmagy milli ykdysadyýetimiziň pudaklaryny ösdürmäge, ykdysady ösüşiň depginini çaltlandyrmaga, dünýä hojalygynda tutýan ornuny berkitmäge ýardam berýär.
Hormatly Prezidentimiziň baştutanlygynda halkymyzyň abadan hem eşretli durmuşda ýaşamagy babatda gazanylýan ösüşler her birimizi buýsandyrýar.
Hojaniyazowa Maral
Döwletmämmet Azady adyndaky Türkmen milli dünýä dilleri institutynyň Iñlis dili we edebiýaty fakultetiniñ talyby
