Zyýanly endikden daş bolan ýagşy.

Saglygymyza ýaramaz täsirini ýetirýän zyýanly endiklere garşy ýurdumyzda  işjeň göreş alynyp barylýar.    Dünýä alymlarynyň aýtmagyna görä zyýanly endikler hasaplanýan çilim çekmek we temmäki önümlerinden peýdalanmak  netijesinde her ýyly ýer ýüzünde 3-4 million adam dürli keseller sebäpli heläk bolýar. Eger onuň öňi alynmasa onda heläk bolanlaryň sany 12 milliona ýeter diýip bellenýär.  Zyýanly endikleriň OIDS, tuberkulýoz, ýol heläkçiligi, çaga ölümi, öz janyna kast etmek ýaly netijelere alyp gelmegi köp adamlaryň durmuşyny zäherleýär.

Türkmenistan  döwletimiz  temmäki  ulanylmagyna garşy işjeň göreş alyp barýar. Hormatly Prezidentimiziň  ýolbaşçylygynda durmuşa  geçirilýän döwlet  syýasatynyň  netijesinde  bu ugurda  toplumlaýyn  çäreler  geçirilýär. 2011-nji ýylyň  martynda  milli  parlamentimiz  tarapyndan  “Bütündünýä  saglygy goraýyş  guramasynyň  temmäkä gözegçilik etmek  boýunça” çarçuwaly konwensiýasy tassyklanyldy. Bu ulgamda  ýurdumyzyň  esasy  gazananlarynyň  hatarynda 2013-nji ýylda kabul eden “ Raýatlaryň saglygyny temmäki tüssesiniň täsirinden  hem-de temmäki önümleriniň  ulanylmagynyň netijesinden  goramak hakynda”  Kanuny  oňyn  netijeler berýär.  

Şeýle hem 2022-nji ýylda Türkmenistany  temmäkiden  azat  ýurda  öwürmek  maksady bilen 2022-2025- nji ýyllar  üçin Milli  maksatnama   tassyklanyldy.  Şonuň bilen   baglylykda  Diýarymyzyň ähli  künjeklerinde ösüp gelýän  ýaş nesiller bilen zyýanly  endikleriň   ynsan  saglygyna ýetirýän  zyýany hakynda wagz-nesihat duşuşyklary geçirilýär.  Ýaramaz endikleriň  öňüni almak häzirki  wagtda  dünýä jemgyýetçiliginiň  öňünde durýan  möhüm   durmuş meseleleriniň biridir.