Kämil bilim — döwrüň derwaýyslygy

Her bir döwletiň ösüş syýasatynyň esasyny düzýän ylym-bilim ulgamyny we ösüp gelýän ýaş nesilleriň bu ulgama höwesini artdyrmak üçin ýurdumyzda guwandyryjy işler amala aşyrylýar. Bu barada türkmen halkynyň Milli Lideri Gahryman Arkadagymyz şeýle belleýär: «Ylmy açyşlaryň, tehnologiki oýlap tapyşlaryň durmuşymyzyň ähli ugurlaryna tapgyrma-tapgyr aralaşýan döwründe halkyň bilime bolan isleg-arzuwyny kanagatlandyrmak, kämil bilim ulgamyny kemala getirmek, milli we umumadamzat gymmatlyklary esasynda ýaş nesillerimizde raýat düşünjelerini kemala getirmek giň möçberli bilim we ylym reformalarymyzyň düýp özenidir, täze taryhy eýýamyň baş talaplarydyr».

Berkarar döwletiň täze eýýamynyň Galkynyşy döwründe Arkadagly Serdarymyzyň tagallasy bilen milli bilim ulgamyny ösdürmek, türkmen ýaşlaryny ylym we döredijilik işlerine ruhlandyrmak babatda uly işler durmuşa geçirilýär. Ýurdumyzda ylym-bilim ulgamyny kämilleşdirmekde durmuşa geçirilýän işleriň esasy mazmunynda adam maýasyny kemala getirmek wezipesi durýar. Ylym-bilimden ýüki ýetik ýaş nesilleri kemala getirmek döwrüň wajyp meseleleriniň biridir. Şol sebäpli hem milli bilim ulgamyny sanly ulgama geçirmek işleri ýurdumyzda meýilnama esasynda durmuşa geçirilýär. Bu babatda «Türkmenistanda sanly bilim ulgamyny ösdürmegiň Konsepsiýasyndan» ugur alynýar. Häzirki wagtda ýurdumyzyň umumybilim berýän orta mekdeplerinde maglumat gory döredilip, bir bitewi ulgama birikdirmek işleri talabalaýyk alnyp barylýar. Şeýle hem, çagalara bilim bermegiň derejesini dünýä tejribesine we milli ýörelgelere daýanyp, ösen talaplara laýyk getirmek bilim ulgamyny ösdürmek babatynda öňde goýlan esasy wezipeleriň biridir.

Berkarar döwletiň täze eýýamynyň Galkynyşy döwründe bilim ulgamyny ösdürmek ugrunda geçirilýän işleriň netijesinde dünýä ülňülerine laýyk gelýän çagalar baglary, orta mekdepler we ýokary okuw jaýlary yzygiderli gurlup ulanylmaga berilýär. Bularyň ählisi hem milli bilim ulgamynyň maddy-enjamlaýyn binýadyny pugtalandyrmakda örän möhüm wezipäni ýerine ýetirýär. Şeýle hem, bu bilim ojaklarynda ösen tehnologiýalaryň, kompýuter tehnikalarynyň ornaşdyrylmagy okuw-terbiýeçilik işini netijeli interaktiw usulda ýola goýmaga ýardam berýär. Şonuň ýaly-da, indi her ýyl ilkinji gezek orta mekdebiň gapysyndan ätleýän ýaş nesillere hormatly Prezidentimiziň adyndan öwrediji kompýuterleriň sowgat berilmegi hem asylly däbe öwrüldi. Ýaş nesillerimiziň ylym-bilimli, giň dünýägaraýyşly ynsanlar bolup ýetişmekleri üçin uly tagallalary edýän türkmen halkynyň Milli Lideri Gahryman Arkadagymyzyň, hormatly Prezidentimiziň janlary sag, belent başlary aman bolsun!

Türkmen döwlet-binagärlik gurluşyk institutynyň Inžiner mehanika fakultetiniň talyby