RU
Gyş almasy
Almalar-da gar üstünde,
Gül açmyşdy güller kimin.
Göterende elim doňdy,
Buza dönmüş eller kimin.
***
Toprak ap-ak örtülüdi,
Barça baglar ukulydy,
Gyş almasy ter gülüdi,
Natýurmort şekiller kimin.
***
Ýürekler buz içindedi,
Almalaryň peşindedi,
Adamlar öz işindedi,
Öwsüp giden ýeller kimin.
Nä bileli
Ganatlanmyş azat guşdy,
Hyýalym dünýäni gezdi…
Dereden, depeden aşdym,
Gyrgy kimin at üstünde.
***
Bu dünýäde daralamda,
Umytlarym gyrylanda,
Ýodalarda ýorulamda,
Uzandym gök ot üstünde.
***
Durmuş ne jüre görjekdik,
Kebelek, ýa mör-möjekdik,
Bilen bolsag-a öljekdik,
Dalaşmazdyk it üstünde.
***
Neden beýle ynsan bolduk,
Neden dosta duşman bolduk,
Ölmäge-de puşman bolduk,
Bäş arçyn çitiň üstünde.
Guşlar ojaga geler
Guşlary sowukdan beýle goradym,
Goradym, ölmesin diýp guşlary gardan,
Olaryň derdine beýle ýaradym,
Şeýdip halas etdim guşlary dardan.
***
Açdym penjerämi, öýe doldular,
Ýyly suw içdiler, dänä iýmledim,
Guşlat birje günlük myhman boldulat,
Itüzümi alyp, çaýda demledim.
***
Ömre ömür gatyp, geliň ynsanlar!..
Guşlar myhman gelsin her birimize,
Olar-da bir janly, kän ýaşasynlar,
Körpe guşjagazlar neýleýär bizi?
Özüme hat
Ýene ýolum üste biter gül-çeçek,
Ýene-de diýer men ýazyň mübärek.
Gelip gül atryndan geçmegiň gerek,
Atyrly şemalda esendir obam
***
Ýaňlandy çaýlaryň, suwlaryň sesi,
Saýrak dilli guşlaň şirin nagmasy,
Dil açar göwnümiň hoş owazasy,
Saýawan görnüş gül açanda obam.
***
Köp çekmez, gyşyň-da ömri az bolar,
Garlawaçlar geler, ýene ýaz bolar,
Ruhuň galksa ajap aýdym-saz bolar,
Sarpaly ýürekler gezende obam.
Türkmen diline terjime eden Toýly Jänädow
