RU
Mähriban Arkadagymyz tarapyndan beýan edilen «Türkmenistanyň Prezidentiniň ýurdumyzy 2019-2025-nji ýyllarda durmuş-ykdysady taýdan ösdürmegiň Maksatnamasy» ýurdumyzda kabul edilen sanly ykdysadyýet maksatnamasyny durmuşa geçirmegiň esasynda, döwrüň talaplaryna laýyklykda taýýarlanyldy. Bu ajaýyp işler ykdysadyýetiň döwlet tarapyndan dolandyrylyşyndan bazar gatnaşyklaryna geçilmegine esaslanýar.
«Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasynda» sanly ykdysadyýete geçmeklik strategiýanyň ileri tutulýan ugry hökmünde bellenildi. Şu döwürde sanly ykdysadyýeti we maglumat jemgyýetini ösdürmek maksatnamasy durmuşa geçiriler.
Sanly ykdysadyýet we Internet-tehnologiýalar jemgyýetçilik durmuşynyň ähli pudaklaryna täsir edýär. Bütindünýä bankynyň hasabatyna laýyklykda Internetiň ösüşi we giňden ulanylyşy söwdanyň möçberini giňeltmäge, maýa goýumlary netijeli ulanmaga, bäsdeşligi güýçlendirmäge, täze iş orunlaryny döretmäge we netijede öndürijiligi ýokarlandyrmaga ýardam berýär.
Sanly ykdysadyýet umumy maksatly täze tehnologiýalaryň kommunikasiýa we maglumat ulgamynda sanly tehnologiýalara öwrülmeginden ýüze çykýan täsiri hökmünde düşündirilýär, bu täsir ykdysadyýetiň ähli pudaklarynda öz beýanyny tapýar. Sanly ykdysadyýete berilýän üns maglumat tehnologiýalarynyň dünýäniň ähli ýurtlarynyň ykdysady ösüşinde barha uly ähmiýete eýe bolýandygy bilen şertlendirilendir.
Häzirki wagtda sanly ulgam arkaly iş alyp barýan toplumlarymyzyň işiniň has-da ýeňilleşendigini aýratyn nygtamak bolar. Sanly bilim ulgamy, söwda we ykdysadyýet, dokma, saglygy goraýyş, gurluşyk we senagat, esasanam, telekeçilik pudagynda sanly ulgamy ornaşdyrmakda örän uly öňegidişlikler gazanylýar. Dünýä tejribesiniň ornaşdyrylmagy ýurdumyzyň has-da belent ösüşlerine itergi bolup durýar.
Ýurdumyzy dünýäniň ösen ýurtlarynyň hatarynda goşmakda, dünýä ähmiýetli beýik başlangyçlary öňe sürýän Gahryman Arkadagymyza hem-de Arkadagly Gahryman Serdarymyza alkyşymyz çäksizdir.
Gözel ÝAÝLYMOWA,
