RU
EJEME
Sen sözläňde…
Sen sözläňde ene ýeriň teýinde
Bagjygyn çözlärdi syry ýelleriň.
Sen sözläňde arşyň çilinden ýöräp
Güllere çyrmaşyp barýardy elim.
Sen sözläňde sözler bişen erik deý,
Sessizje düşerdi, görüpdim telim.
Gelerdi bir owaz,düzülendi ol,
Harplaň arasynda görmändim ýelim.
Sen sözläňde hüwdi beýläk geçerdi,
Ýalňyşyn bilen bir çaga mysaly.
Sen sözläňde meniň kelläm göçerdi,
Dyrmyşan deý beýik daga mysaly.
Sen sözläňde aýallary gam basyp,
Ojagyň başynda oýlandyrardy.
Sen sözläňde şähdiň ýokarky tary,
Daş- töweregiňi gozgandyrardy.
Sen sözläňde jigimiň towly saçy
Mekgejewen gulpagyna meňzärdi.
Sen sözläňde, meň ýüregmiň içinde
Daşaryk çykmaga bir güýç dyňzardy.
Sen sözläňde, dertlerimi bir pozguç,
Gorkup, elin sandyradyp pozardy.
Sen sözläňde ýapraklaryn atan bag,
Kyn bolsa- da gaýdyp tele düzerdi.
Sen sözläňde bolmaýan zat bolardy,
Gelerdi üstüňden gülleriň sesi.
Sen sözläňde betbagtlar gülerdi,
Dertliler donundan çykardy geňsi.
Sen sözläňde älem dymardy bir hal!
Sen sözläňde agtygňa aýak biter,
Pelegiň çarhynda togtardy mähir,
Maňa güýç bererdiň öňküden beter.
Sen sözläňde…
Ogluma
Sen meniň syrdaşym, köňül köçäm sen:
Barýaryn içinden şarfymy süýräp…
Bu köçede “Nirä barýaň?” diýlenok.
Dogurdan hem…
“Agşam nirä barýarkam?..”
Özümem oýlanýan: “Bu köçe hezil”,
Ugrumy hem bilýän, ajykmaýanam…
Megerem şu köçä aşyk bolanym
Üçindir, meşhur däl…
Adykmaýanym…
Bu köçede äýnek tozanlap galýar,
Görkezesi gelse, görkä:r her reňkde…
Akyllar eplenýär, güýç toba gelýä,
Bir gudrat döreýär etde hem süňkde…
Daga dyrmanmaga ugur bar bärde,
Suwdan geçseň- köpri,
bugdaýly meýdan…
Şarfymyň seçegni süýräp barýan men,
Özümi bu köçä myhmandyr öýtmän…
Dyrnagym bilenjik gazýan ýaplaryn,
Çöp- çalamyn aýryp, her taşlan bendäň…
Saçym ýarym döküp, ýarysyn toplap,
Şemal garşysynda hopukýan men däl…
Hemmesinden üstün, güýji bar ýaly,
Hiç kim düşündirmez, milt etmez asla…
Bu köçe şeýlebir serim durlaýar,
Aşagy boz toprak, depesi asman…
Hyýal guşum gonýar gapdalda baga,
Perdeleri ýyrtyk sahna töwerek…
Göýä ujy alyslarda uzaýa,
Ondna başga zatlar nämäme gerek?
Bagtyýarmy? Şeýle!Şygyr ýaz, aýdym,
Parhy ýok, gitmersiň yssylap, üşäp…
Şu ýolumdan aýyrmasyn ýaradan:
Sen meniň mährabym, sen meniň köçäm…
Ogluma
Hiç wagt ýeňilme oglum,
Ýeňjegem bolma, gerek däl.
Adamlaryň ýürekleri,
Seniňki ýaly ýürek däl…
Biri bagtyň dilär weli,
Beýlekisi gyýa bakar.
Käbiri güne garşydyr,
Ýörär durar tüme bakan…
Biri bulutdyr, kä görseň,
Emma ýüregi ýükdendir.
Oglum, hiç wagt ýeňilme,
Seň egniňe ýük ýüklendi.
Biri itse, ýüküň gaçar,
Degme hiç göwnüne oglum,
Bize ýeňmegem ýaraşmaz,
Ýöne sen ýeňilme oglum.
Onsoňam öwünme oglum,
Ýeňme- de ýeňilme oglum,
Dünýe bir gögerçinhana,
Öwretgin ogluňa oglum,
Öwretgin kowmyňa oglum!
Obamyzyň agşamlary
Gije uzak söhbet gurup,
Ýeňňeler saklar baldyzyn.
Edil hindi kino ýaly,
Agşamlary obamyzyň…
Hem süýji, hem höwrügersiň,
Ýoldan geçseň howlugarsyň,
Başga zada öwrülersiň,
Niýet etseň,gowlugasyň,
Agşamlary obamyzyň…
Göreçlerde akar galar,
Köňül köňle bakar ýalak,
Kalba keşde çeker ýalak,
Agşamlary obamyzyň…
Tokaý kysmy güjümleri,
Çyzgyç kysmy biçimleri,
Ýatladyp dur- ejeňleri,
Obamyzyň agşamlary…
Ysy geler igdeleriň,
Köli ýaly dideleriň,
Ejizleseň- ýigdeleniň,
Obamyzyň agşamlary…
Ýaşlygňy ýatladar durar,
Saçlarňa ýel gurar duzak,
Duraweriň uzak- uzak,
Obamyzyň agşamlary…
Päli ýalydyr reňki- de,
Daňlaryň gülgün çüňkidir,
Müň ýyldan soň hem öňkidir,
Obamyzyň agşamlary…
Oba gijesi
Belki seň gözlerňe başgaçarakdyr,
Obamyň agşamy, oba gijesi…
Ýyldyzlaň ýagtysy goşmaçarakdyr,
Obamyň agşamy, oba gijesi…
Synlarsyňyz çilden öýi, öýden çil,
Gelniňiz bar, daşa çykmaz, öýdeçil.
Iki melek arasynda gyýdyşyn-
Obamyň agşamy, oba gijesi…
Çyrlaklaň sesinden durar ýalak däl,
Gülleň nepesinden dymar ýalak däl,
Göýä bahar zemin sary dyrnaklan,
Obamyň agşamy, oba gijesi…
Derman- däri bilen saklanýan ýaly,
Dälilik hetdinden köklenýän ýaly,
Allaowarrada eplenýän ýaly,
Obamyň agşamy, oba gijesi…
Ar alypdyr ýaşlyk geçen günlerden,
Bärden baksaň, pişme seçen günlerden,
Söýgiden ak süýdi içen günlerden,
Obamyň agşamy, oba gijesi…
Gaýtalanyp dursn, hakyda ýaly,
Şäherde gezsem hem gapymda ýaly,
Gyşda bahar, ýaz gyş ýakynda ýaly,
Obamyň agşamy, oba gijesi…
Kalbym güle gömülendir, kim bilýär?
Saçym ýagşa ezilendir, kim bilýär?
“Çykyp gitsem” diýýän munda üm- düzme,
Obamyň agşamy, oba gijesi…
Ömür
Bilýäňmi , şol gün hem ýagyş ýagypdy,
Şol günler hem meniň adym bilýädiň…
Öýkeli dideler bagyşlanypdy,
Tahýa-da ýazypdym gysga däl adyň.
Göwnümemi, göwnümedir belki-de
Şonda dag tarapdan gelipdi duman…
Gül ýoljak bolupdyň: “Elleme!”- diýdim,
Sen synlapdyň şonda meni, ähtimal.
Goýberip saçlarmyň basgançak taryn,
Şemal her tolkunna düwnüpdi şonda.
Çeşmäň gözbaşynda durduk ikimiz,
Suwlar yşka düşüp, ýüwrükdi, şonda.
Gaçypatalgasy ýaly köňülleň,
Jülgeler oýtumdy, oýukdy olar.
Gara daglar durdy , günüň öňünne,
Kuýaşyň ganyndan doýupdy olar.
Ýylgyrjakdym çykyp bilsem ejapdan,
Hem näler bakjakdym, garaklaryňa.
Utandym. Bir şonda ýöredim gitdim,
Basdym- da jülgede daraklygyma.
Emma geçdi ömür, agardy saçy
Ikimize şaýat bolan ýyllaryň…
Men ejapdan, senem şol päk söýgiňden
Galdyk başga jülgelerde süllerip…
Garaşmak
– Owadan gijeler sowap başlady,
Güýzüň dökjek zerlerine ýer ýasap.
Agaçlar toprakdan nemlenen borly,
Çygjaryp dur,
Elläp görseň, der basyp…
Merdiwany döwülipdir, alysda
Gökden aslyşyp dur mawy bulutlaň…
Sen şol gün,
Sen şol gün saçlarmy sypap,pyşyrdadyň,
Muny iki dünýäň arasynda duranymda-da unutman…
Ýene-de ýegşerýär, aýyň erňegi,
“Ýok, bu güýzem gaýdyp gelmez” diýip ýa…
Ýagyş damjalaýar agaçlaň, baglaň,
Begresinden taýyp, ýere tyýpýa…
Men ýene-de durun daňyň çotgasyn,
Haçan gaçyrarka, elleri?- diýip…
Şol günem şeýledi,
Toprak çyglydy…
Aglap çawuş çakan ýyllary duýup…
Ýene güýze taýýarlaýar eşigni,
Enä meňzeş baglar, hellew-de hellew…
Döwük merdiwan dek bölek bulutlar:
-Geler,
-Gelmez…
-Geler…
-Gelmez- le diýip…
Parhy ýok, älemde kimdir biriniň,
Bir ýerlere barmaklygy hökman däl…
Sen bilmänem galdyň,
Saçym sypanda
Seň kalbyňa meni unutmaz ýaly,
Sanjym goýberipdir,
Göýä lukmanlar…
