RU
Amsterdam, Niderlandlaryň paýtagty, diňe bir Ýewropanyň dörän şäherleriniň biri bolman, eýsem, ajaýyp gözelligi, taryhy kökleri we täsin medeniýeti bilen dünýäni haýrana goýýan jadyly künjekdir. Bu şäherde her bir burçda lowurdaýan owadanlyk we hiç ýerde duş gelmeýän bir erkinlik ruhy höküm sürýär.
Amsterdamyň iň esasly we göze ilýän aýratynlygy, onuň zynjyr ýaly ähli ýere uzalyp gidýän taryhy kanallarydyr. Bu kanallar (ýa-da grachtlar) şäheriň “Demirgazygyň Wenesiýasy” diýlip atlandyrylmagyna sebäp bolupdyr. Olaryň köpüsi XVII asyrda gurlup, şäheriň altyn döwrüniň şaýadydyr. Kanallaryň gyrasyndaky köne daş ýoljagazlarda pyýada gezelenç etmek, ýa-da gondola meňzeş kiçijik gaýykda suwuň ýüzünde süýşmek, adama asudalyk we rahatlyk berýär. Şäheriň merkezindäki şowhun kanallaryň gyralarynda birden ýuwaşap, romantik bir duýgy döredýär.
Kanallaryň boýunda hatarlanyp duran kiçijik reňkli jaýlar Amsterdamyň kartpostallardaky meşhur keşbini emele getirýär. Bu jaýlar esasan dar we uzyn bolup, taryhy sebäplere görä öňler ýer salgytlary jaýyň giňligine bagly bolandygy üçin şeýle gurlupdyr.
Jaýlaryň iň täsin aýratynlygy olaryň ýokarsyndaky egrelen diwarlar (ýa-da ýokary süýşürilen üçburçlyklar) we ýokaryk çykyp duran ilgikleridir. Gadym wagtda jaýlar gaty dar bolany üçin, uly zatlary (mebelleri we beýleki agyr harytlary) gapylardan salmak mümkin däl eken. Şonuň üçin jaýyň ýokarsyndaky ilgige berkidilen tirkeg arkaly zatlar ýokarky pillerden jaýyň içine alnypdyr. Jaýlaryň öňe egrelen bolmagy hem tirkelýän zadyň jaýyň diwaryna degmeginiň öňüni alypdyr. Bu aýratynlyk şähere özboluşly, täsin we owadan görnüş berýär.
Amsterdamyň iň geň we aýratyn medeni aýratynlygy onuň welosipedleri ýa-da “Welosiped Medeniýetidir”. Şäherde adam sanyndan köp welosiped bar. Bu, diňe bir ulag serişdesi bolman, eýsem, ýaşaýyş durmuşynyň bir bölegidir.
Welosipedler bilen kanallaryň boýunda sürmek, taryhy köçelerde aýlanmak size başga bir erkinlik berýär. Şäher asuda we ekologik taýdan arassa galýar. Amsterdama gelýän jahankeşdeler üçin-de welosiped sürmek, ýerli adamlaryň durmuşynyň bir bölegi bolmaga we şäheri içgin duýmaga iň gowy mümkinçilikdir.
Amsterdam sungatyň, erkinligiň we taryhyň ajaýyp utgaşmasy bolup, her bir myhmanyň kalbynda ýatda galyjy yz galdyrýar. Bu şäherde aýak üstünde ýa-da welosipedde gezelenç edeniňizde, özüňizi täsin bir ertekiler dünýäsine düşen ýaly duýarsyňyz.
Agaýewa Ogulnäzik
Halkara senagatçylar we telekeçiler uniwersitetiniň Dil öwreniş bölüminiň 119-njy toparynyň talyby
