RU
Türkmenistan Garaşsyzlygyny alandan soň, milli gymmatlyklarymyzy dikeltmekde uly işler alnyp baryldy. Şolaryň biri hem Hasyl toýuň döwlet derejesinde täzeden ornaşdyrylmagydyr. Türkmenistanyň Prezidentiniň Permany bilen Hasyl baýramy her ýylyň noýabr aýynyň birinji ýekşenbesinde bellenilýär.
Bu karar halkymyzyň gadymy däpleriniň döwrebap ýagdaýda dowam etdirilmegine, oba hojalyk işgärleriniň zähmetiniň hormatlanmagyna giň ýol açdy.
Her ýylda Hasyl baýramy mynasybetli ýurdumyzyň ähli welaýatlarynda dabaraly çäreler guralýar. Aşgabatda we welaýat merkezlerinde oba hojalyk sergileri açylýar. Galla, pagta, miwe, gök önüm, bal, süýt önümleri ýaly dürli ekerançylyk önümleri görkezilýär.
Daýhanlaryň, kärendeçileriň, bagbanlaryň arasynda bäsleşikler geçirilýär. Hasyl ýygnamakda öňe saýlanan daýhanlara döwlet sylaglary gowşurylýar. Baýramda aýdym-sazly çykyşlar, teatrlaşdyrylan sahna oýunlary, sport ýaryşlary hem guralýar.
Hasyl toý diňe bir oba hojalyk baýramy däl, eýsem jemgyýetde birlik, dostluk, minnetdarlyk duýgularyny pugtalandyrýan baýramdyr. Halk bu baýramda topraga, zähmete, watana bolan söýgüsini görkezýär.
Bu baýram ýaş nesillerde zähmetsöýerligi, halal iş etmek, daýhan zähmetine hormat goýmak ýaly ahlakly aýratynlyklary terbiýeleýär. Şeýle-de, Hasyl toýy halk döredijiliginiň – aýdym-sazlaryň, goşgularyň, halk oýunlarynyň baý çeşmesine öwrülýär.
Hasyl baýramynyň häzirki döwürde giňden bellenilmegi ýurdumyzyň oba hojalyk pudagyndaky ösüşleriň netijesidir. Soňky ýyllarda döwrebap suwaryş ulgamlary, täze traktorlar, galla arassalaýjy tehnikalar ulanyşa girizildi.
Daýhan hojalyklarynda öndürilýän galla, pagta, miwe we gök önümleriň möçberi ýylsaýyn artýar. Munuň özi döwlet tarapyndan oba hojalygyna berilýän goldawyň netijesidir. Hasyl baýramynda bolsa şol ösüşleriň jemleri halk bilen bilelikde baýram edilýär.
Nuraly ALTYÝEW
S.A.Nyýazow adyndaky Türkmen oba hojalyk uniwersitetiniň Weterinar lukmançylygy fakultetiniň Weterinar lukmançylygy hünäriniň 3-nji yyl talyby
