RU
Adamzadyň taryhynda sungat diýlende, köplenç, heýkeltaraşlyk, surat çekmek ýa-da aýdym-saz ýaly eserler göz öňüne getirilýär. Emma hakykatda, ynsan siwilizasiýasynyň iň irki döwürlerinde dörän we durmuşyň goralmagy bilen gönüden-göni baglanyşykly bolan iň kämil we möhüm sungat – bu awçylykdyr. Awçylyk, diňe bir iýmit edinmek usuly bolman, eýsem, akyl, fiziki kämilleşme, strategiýa we tebigat bilen sazlaşyk talap edýän ýaşaýyş sungatydy.Awçylyk fiziki güýçden has beter, akyl işjeňligini we meýilnamalaşdyrmagy talap edýän sungatdy.
Ussat awçy, owuň yzlaryny, hereket edýän ugruny, iýmitleniş we dynç alyş ýerlerini bilimdar we çuňňur gözegçilik arkaly öwrenýärdi. Bu, tebigatyň kanunlaryny doly bilmegi we yzygiderli seljermegi talap edýärdi – bu ylymyň we synag etmegiň başlangyjy bolup durýar.Uruş sungatyndaky ýaly, awçylykda hem duşmanyň hereketini çaklamak we ony duzaga düşürmek üçin toparyň arasynda ýakyn aragatnaşyk we strategiýa möhüm bolupdyr. Bu akyl we bilelikdäki iş, jemgyýetçilik guramasynyň we hyzmatdaşlygyň ilkinji nusgalaryny döretdi.
Awçylyk adamyň fiziki ukyplarynyň iň ýokary derejesini talap edýärdi, bu bolsa sportuň esasy gymmatlygyny alamatlandyrýar. Uly we çalasyn haýwanlary yzarlamak üçin awçy uzak aralyklara ylgamagy, ýadamazlygy we zerur pursatda iň ýokary tizligi görkezmegi başarmalydy. Ok ýa-da naýza atmak, awçylyk ýaraglaryny ýasaýyş prosesi kämil el we göz utgaşyklygyny we inçe ussatlygy talap edipdir. Bu, soňlugy bilen, sportuň ok atyjylyk, zynjyr ok atmak ýaly görnüşleriniň gözbaşy bolup hyzmat etdi.Awçylyk diňe bir ykdysady iş bolman, eýsem, gadymy adamlaryň ruhy we medeni durmuşynyň aýrylmaz bölegi bolupdyr.
Aw sahnasyny görkezýän gowak suratlary, adamzadyň iň gadymy çeper eserleri bolup durýar. Olar awyň öň ýanyndaky ritual maşklary ýa-da üstünlikli awdan soňky wakalary beýan edip, awçylygyň waka gürrüň beriji sungat bolandygyny görkezýär.Köp gadymy medeniýetlerde, aw öňüsyrasynda haýwanyň hereketlerini ýa-da aw prosesini görkezýän tanslar ýerine ýetirilipdir. Bu tanslar adamlaryň ruhuny galdyrmaga we üstünlik getirmäge gönükdirilip, sahnanyň we hereket sungatynyň ilkinji nusgasy bolupdyr.
Awçylyk, adamzadyň durmuşynda ilkinji dörän, ýaşaýyş, intellekt we fiziki kämilleşmäni utgaşdyran sungatdyr. Ol diňe bir beden ussatlygyny talap etmän, eýsem, çylşyrymly akyl strategiýasyny we tebigat bilen duýgudaşlygy özünde jemleýär. Awçylyk sungaty, soňky döwürlerde sport, sungat we hatda ylym hökmünde ösen ähli çeper we kämil işjeňlikleriň gadymy binýady bolup durýar.
Atamyradowa Şeker
Halkara senagatçylar we telekeçiler uniwersitetiniň Dil öwreniş bölüminiň 111-nji toparynyň talyby
