RU
Sport taryhyň ähli döwürlerinde diýen ýaly ynsanlary birleşdiriji, ýurtlary ýakynlaşdyryjy güýç bolup hyzmat edipdir. Ol diňe bir fiziki güýç synanyşygy däl, eýsem, milletleriň, medeniýetleriň we ynançlaryň arasynda parahatçylygyň we dostlugyň berk binýadyny döredýän halkara dildir.Sport ýaryşlary—Olimpiýa oýunlary, Aziýa oýunlary ýa-da dünýä çempionatlary bolsun—dünýäniň dürli künjeginden gelen türgenleri bir meýdançada jemleýär.Bu, dünýä jemgyýetçiligine gatnaşyklaryň we çözgütleriň gapma-garşylyksyz ýa-da uruşsyz, medeni ýol bilen çözülip bilinjekdigini görkezýär.Ýeňen we ýeňilen taraplar ýaryş gutarandan soň bir-birini gutlap el sıkýarlar. Bu kiçijik hereket özara hormatyň we bäsdeşlikden soňky birikmäniň iň güýçli nyşanydyr.
Türkmenistan Bitaraplyk ýörelgesine esaslanyp, sporty halkara gatnaşyklary ösdürmegiň möhüm serişdesi hökmünde görýär.Aşgabat şäherinde üstünlikli geçirilen Ýapyk binalarda we söweş sungaty boýunça V Aziýa oýunlary (Aşgabat 2017) Türkmenistanyň parahatçylyk we dostluk dörediji güýç hökmündäki abraýyny has-da berkitdi. Bu oýunlar Aziýanyň we Okeaniýanyň ýurtlarynyň arasynda gatnaşyklary pugtalandyrdy.Türkmenistan welosiped sporty arkaly parahatçylygy we ekologiýany wagyz edýär. Bütindünýä welosiped güni bilen bagly yzygiderli geçirilýän çäreler, bu sportyň halklaryň arasynda düşünişmegi we dostlugy ösdürmekdäki ähmiýetini görkezýär.
Türgenler, tälimçiler we janköýerler gatnaşan ýurtlarynyň medeniýetlerini öwrenýärler, täze dostlar tapýarlar.Sport – bu biziň umumy dilimizdir. Dünýäniň niresinde bolsaňyz-da, topuň hereketi ýa-da ýaryşyň düzgünleri ähli dile terjimesiz düşnüklidir. Bu, halklaryň arasyndaky duşmançylyk däl, eýsem, birikme meýlini güýçlendirýär.
Sport – diňe bir medal üçin däl, eýsem, ynsan mertebesi, hormat we parahatçylyk üçin göreşdir. Ol her birimiz we tutuş adamzat üçin birlik, dostluk we geljekki parahatçylygyň girewidir.
Baýramow Aman
Halkara senagatçylar we telekeçiler uniwersitetiniň Dil öwreniş bölüminiň 111-nji toparynyň talyby
