RU
Sport türgenleşikleri – bu diňe bir fiziki taýýarlyk däl. Ol, esasan-da, ýaş nesilleriň ruhy, ahlak we raýatlyk häsiýetlerini berkidýän, geljekki durmuşyň kynçylyklaryna taýýarlaýan kämil mekdepdir. Sport meýdançasynda berkän, ýeňşiň we ýeňlişiň manysyny öwrenen ýaşlar, hakykatdanam, biziň ygtybarly, durnukly we ösüşli geljegimiziň daýanjydyrlar.Sport, ýaşlara durmuşda hiç bir okuw kitabynyň berip bilmejek gymmatly sypatlary öwredýär.
Sport türgenleşigi, agyra we ýadawlyga garamazdan maksada ýetmek ugrunda yzygiderli hereket etmegi talap edýär. Bu, ýaşlaryň iradesini berkidýär, olara kynçylyklaryň öňünde ýylman galmazlygy öwredýär. Şeýle häsiýetli adamlar, geljekde işde ýa-da bilimde duş geljek ähli synaglary ýeňip bilýärler.Sport bilen meşgullanmak, gündelik tertibi, dogry iýmitlenmegi we ýatymy doly ýerine ýetirmegi talap edýär. Bu berk düzgün, ýaşlary jogapkärçilikli bolmaga we öz wagtyny dogry paýlamaga öwredýär. Bular, işjeň we düzgünli jemgyýetiň esasy şertleridir.Sport diňe beden däl, eýsem, ýaşlaryň akyl ukyplylygyny hem ösdürýär.
Topar oýunlarynda ýa-da bäsleşiklerde, türgen bir sekundyň dowamynda ýagdaýy seljerip, dogry taktiki karary çykarmaly bolýar. Bu, aňyň çalasynlygyny ösdürýär. Şeýle ukyply ýaşlar, geljekde islendik krizis ýagdaýynda çalt we netijeli çözgütleri tapyp bilerler. Sport bilen meşgullanýan ýaşlar hemişe öz öňlerinde belli bir maksat goýýarlar (agramy götermek, tizligi ýokarlandyrmak, ýeňiş gazanmak). Bu, olaryň durmuşyny maksatly we manysyny edýär, bu bolsa geljekki ösüşiň iň ygtybarly daýanjydyr.Sport, ýaşlary Watanyna we jemgyýetine bolan söýgä we wepalylyga terbiýeleýär. Topar oýunlaryna gatnaşýan ýaşlar, bilelikdäki zähmetiň, dostlugyň we özara goldawyň ähmiýetini gowy bilýärler. Olar, şahsy bähbitden has ýokarda durýan umumy maksadyň daşynda jebisleşmegi öwrenýärler. Bu, raýatlaryň arasynda agzybirligi üpjün edýär.
Ýaş türgenler halkara meýdançalara çykanda, olaryň her bir üstünligi tutuş ýurduň üstünligidir. Türkmenistanyň baýdagyny belentde parlatmak we Döwlet Senasyny diňlemek, olaryň Watana bolan söýgüsini we jogapkärçiligini has-da berkidýär. Şeýle watansöýüji ýaşlar – biziň geljegimiziň iň uly kepilidir.
Sport türgenleşiklerinde berkän, hem fiziki, hem ruhy taýdan kämilleşen ýaşlar – bu diňe bir medal getirijiler däl. Olar, iradäniň, tertibiň, agzybirligiň we ýokary raýatlyk jogapkärçiliginiň görkezijisidir. Olaryň bu sypatlary, bize ygtybarly, parahat we ösüşli geljegi gurmaga ýardam etjek esasy daýançdyr.
Orazmuhammedowa Gözel
Halkara senagatçylar we telekeçiler uniwersitetiniň Dil öwreniş bölüminiň 111-nji toparynyň talyby
