RU
Bedenterbiýe we sport, köpçüligiň gözünde diňe bir fiziki maşklar topary ýa-da ýaryşlar däl-de, gaýtam, milletiň ruhuny, gymmatlyklaryny we durmuş ýörelgesini özünde jemleýän jemgyýetçilik medeniýetiniň iň ähmiýetli we aýrylmaz bölegidir.Sport, adamzadyň irki döwürlerinden bäri medeniýetiň esasy elementleriniň biri bolup gelýär. Gadymy Gresiýadaky Olimpiýa oýunlary diňe bir ýaryş däl, eýsem dini we medeni dabarady. Türkmen halkynyň milli oýunlary – at çapmak, göreş, ýaglyga towsulmak – biziň milliligimizi, batyrlygymyzy we myhmansöýerligimizi görkezýän medeni mirasyň dowamydyr.
Sport düzgünleri (meselem, “Fair Play” ýa-da adalatly oýun) diňe meýdança üçin däl. Ol jemgyýetde mertligiň, adalatlylygyň we hormatyň nähili bolmalydygyny görkezýän medeni ölçegleri döredýär.Bedenterbiýe diňe bir bedeni däl, eýsem, ynsanyň içki dünýäsini hem terbiýeleýär, onuň ahlak medeniýetini ýokarlandyrýar. Yzygiderli maşklar we kynçylyklary ýeňip geçmek ukyby adamyň erk-islegini we sabyrlylygyny ösdürýär. Bu häsiýetler okuwda, işde we maşgalada üstünlik gazanmak üçin möhüm medeni talapdyr.Futbol, woleýbol ýaly toparlaýyn sportlar adamlara bir maksat üçin bilelikde işlemegi, birek-birege ynanmagy we şahsy bähbitleri toparyň bähbidinden aşakda goýmagy öwredýär. Bu, jemgyýetçilik we işewürlik medeniýetinde zerur bolan agzybirlik gymmatlygydyr.Türgenleşik prosesi ýa-da bedenterbiýe sapagy adamyň durmuşyna belli bir tertibi we disiplinany getirýär. Disiplina bolsa ösen we guramaçylykly jemgyýetiň esasy medeni alamaty bolup durýar.
Uly sport çäreleri – jemgyýetçilik medeniýetiniň iň ýokary derejede beýanydyr.Ýurduň sportda gazanan ýeňişleri tutuş milleti birleşdirýär, watansöýjülik duýgusyny artdyrýar we umumy buýsanç döredýär. Bu pursatlar jemgyýetçilik medeniýetiniň ýokary göterilmegine şert döredýärBedenterbiýe we sportuň meşhurlaşdyrylmagy jemgyýetde sagdyn durmuş ýörelgesini, ýagny ýaramaz endiklerden daş durmagy üpjün edýär. Sagdyn nesil we sagdyn maşgalalar – bu medeniýetiniñ möhüm ýeňşidir.
Bedenterbiýe we sport diňe bir beden berkitmek däl. Olar biziň taryhymyz, edep-eklagymyz, agzybirligimiz we ruhubelentligimiz bilen aýrylmaz baglanyşykly bolup, jemgyýetimiziň umumy medeniýetiniň iň esasy, gurluşyk materialydyr. Sport medeniýetini ösdürmek – bu milletiň geljeginiň medeni binýadyny berkitmekdir.
Gurbanow Mahmyt
Halkara senagatçylar we telekeçiler uniwersitetiniň Dil öwreniş bölüminiň 112-nji toparynyň talyby
