RU
Medeniýet we Ruhy Bütewilik düşünjesi, Türkmenistanda diňe bir döwlet derejesindäki maksatnama däl, eýsem, millet hökmünde türkmen halkynyň aňyýetini we özboluşlylygyny kesgitleýän esasy filosofiýa hasaplanýar. Bu iki düşünje aýrylmaz baglanyşykly bolup, jemgyýetiň durnuklylygyny, jebisligini we geljekki ösüşini üpjün edýär.Medeniýet, giň manyda, halkyň taryhy we jemgyýetçilik ösüş prosesinde döredilen ähli maddy we ruhy gymmatlyklarynyň jemidir.Bu, Gündogar binagärligine esaslanýan ak mermerli Aşgabat şäheri, gadymy Nusaý, Köneürgenç, we Gadymy Merw ýaly taryhy ýadygärlikler we halk amaly-haşam sungatynyň (haly, şaý-sep, keşde) eserleridir. Bu gymmatlyklar ÝUNESKO-nyň Bütindünýä mirasynyň sanawyna girizilip, dünýä derejesinde goralýar.
Ruhy Medeniýet kategoriýa halkyň ahlak ýörelgelerini, däp-dessurlaryny, ynanýan gymmatlyklaryny, Görogly dessançylyk sungatyny, Küştdepdi tans dessuryny we dutar ýasamak senetçiligini, bagşyçylyk sungatyny öz içine alýar. Ruhy medeniýet, adamyň aňyny, duýgusyny we ahlagyny kemala getirýär.Türkmenistanyň döwlet syýasaty medeni gymmatlyklary diňe saklamak däl, eýsem, olary sanly tehnologiýalary ornaşdyrmak arkaly has-da kämilleşdirmäge we dünýä ýaýmaga gönükdirilendir.Ruhy bütewilik – bu türkmen jemgyýetiniň agzybirligini, bir bitewi dünýägaraýşa eýe bolmagyny we umumy milli maksatlara ugrukmagyny aňladýar.
Bütewiligiň esasy, türkmen halkynyň gadymdan gelýän ruhy köklerinde ýatýar. Beýik türkmen şahyrlary we akyldarlary (Magtymguly Pyragy ýaly) öz eserlerinde halkyň jebisligini, ynsanperwerligini we Watana bolan söýgüsini wagyz edipdirler. Ruhy bütewilik, adamlaryň arasyndaky gatnaşyklary düzgünleşdirýän ahlak we edep-terbiýe ýörelgeleri bilen berkidilýär. Bu, her bir türkmen raýatynyň özüniň jemgyýetdäki ornuna we borjuna düşünmegini üpjün edýär.Ruhy medeniýet, jemgyýetçilik aňynyň dürli görnüşlerini (bilim, ahlak, ynançlar) bir ýere jemläp, halky bir bitewi milli ruha eýe edýär.Türkmenistanyň bu ugurdaky syýasaty, ýurduň Garaşsyzlyk we Bitaraplyk statusyna esaslanyp, dünýä döwletleri bilen medeni alyşmalary we dost-doganlyk gatnaşyklaryny pugtalandyrmaga gönükdirilendir.Her ýyl ýurduň içinde we daşynda Medeniýet günleri, halkara festiwallar, sergiler we maslahatlar yzygiderli geçirilýär. Munuň maksady, türkmen medeniýetini dünýä ýaýmak we beýleki halklaryň medeniýetlerini öwrenmekdir. Türkmenistan taryhy we medeni gymmatlyklaryny gorap saklamak, olary geljekki nesillere ýetirmek ugrunda ÝUNESKO ýaly iri halkara guramalar bilen netijeli hyzmatdaşlyk edýär.
Netijede, Medeniýet we Ruhy Bütewilik türkmen döwletiniň ýüregi bolup, halkyň ruhy kuwwatyny artdyrýar, jemgyýetde agzybirligi pugtalandyrýar we Türkmenistanyň dünýä giňişliginde öz abraýyny we özboluşlylygyny saklamagyna esas bolup hyzmat edýär.
Çolukowa Söýli
Halkara senagatçylar we telekeçiler uniwersitetiniň Dil öwreniş bölüminiň 114-nji toparynyň talyby
