RU
Tans diňe bir sungat ýa-da göwün açyş däl, eýsem ol döwrebap dünýäde iň täsirli we owadan sport görnüşleriniň biridir. Tans sporty (Dancesport) — bu sazlaşygyň, fiziki güýjüň, çeýeligiň we estetikaň iň ýokary derejesini talap edýän özboluşly ugurdyr.
Tans sporty — bu jübütleriň ýa-da toparlaryň belli bir sazlaşykda, ýörite bellenen kadalar esasynda ýaryşmagydyr. Bu ugurda diňe bir owadan hereket etmek ýeterlik däl, eýsem sportçyda ýokary çidamlilik, koordinasiýa we psihologik durnuklylyk bolmalydyr.
Ball tanslary
Halkara derejesinde tans sporty esasan iki uly programmaga bölünýär:
Lating-Amerikan programmasy (Latin):
Bu ugur özüniň joşguny, ritmi we emosiýalary bilen tapawutlanýar. Bura 5 sany esasy tans girýär:
Samba: Braziliýanyň karnawal ruhy.
Çe-çe-çe: Oýunçy we şadyýan ritmler.
Rumba: “Söýgi tansy” diýlip atlandyrylýar, örän haýal we duýguly.
Pasodobl: Ispan öküz uruşlaryny (korrida) janlandyrýan tans.
Jaýw (Jive): Örän çalt we energiýa doly tans.
Ýewropa programmasy (Standard):
Bu ugur sypaýyçylygyň, asyllylygyň we klassikanyň nusgasydyr:
Wals (Haýal wals): Sazlaşykly we ýumşak hereketler.
Tango: Güýçli we kesgin hereketli drama.
Wena walsy: Örän çalt we aýlawly tans.
Fokstrot: Erkin we uzyndan-uzyn ädimler.
Kwikstep: Adyndan belli bolşy ýaly, örän çalt we böküşli hereketler.
Tans sporty adamyň diňe bir bedenine däl, ruhuna-da peýdalydyr.Bir ýaryşyň dowamynda tansçynyň sarp edýän energiýasy professional futbolçynyňky ýa-da ýüzüjiňki bilen deňeşdirilýär.
Beden bürüşmesini (osanka) düzedýär we myşsalaryň çeýeligini artdyrýar.Saz bilen işlemek stresi azaldýar we özüňe bolan ynamy berkidýär.Çalt üýtgeýän hereketleri we ritmleri ýatda saklamak akyl ukybyny ösdürýär.Tans sporty boýunça dünýä we Ýewropa çempionatlary yzygiderli geçirilýär. Eminler baha berende şu aşakdakylara üns berýärler.
Ritm: Sazyň depginine we taktyna kybapdaşlyk.
Tehnika: Aýaklaryň we bedeniň işjeňligi.
Sazlaşyk: Jübütleriň biri-birini duýşy.
Artistiklik: Tansyň ruhuny tomaşaça we emine ýetirip bilmek ukyby.
Tans sporty (hususan-da Breakdancing) 2024-nji ýyldaky Pariž Olimpiadasynda resmi taýdan sport görnüşi hökmünde kabul edildi.30 minutlyk çalt depginli tans sportunyň dowamynda ortaça 200-400 kaloriýa ýakylyp bilner.Professional tansçylaryň lybaslary el işi bolup, olar gymmat bahaly daşlar (Swarowski) bilen bezelýär. Bir köýnegiň agramy käte birnäçe kilograma ýetip bilýär.Tans sporty — bu diňe bir ýaryş däl, eýsem bedeniň saz arkaly gürlemegidir. Eger siz hem sporty we sungaty söýýän bolsaňyz, bu ugur siziň durmuşyňyza täze öwüşginler goşup biler.
Nurşaýew Dawutberdi
Halkara senagatçylar we telekeçiler uniwersitetiniň Dil öwreniş bölüminiň 120-nji toparynyň talyby
