RU
Täze ýyl baýramy Türkmenistanyň her bir ýerinde, her bir ojagynda aýratyn bir mähir we uly joşgun bilen garşylanýar. Bu baýram diňe bir senenamanyň täzelenmegi bolman, eýsem, halkymyzyň ruhy bitewüliginiň, geljege bolan ynamynyň we döredijilikli zähmetiniň aýdyň dabaralanmasydyr.
Aşgabat — parahatçylygyň we gözelligiň şäheri hökmünde Täze ýyl dabaralarynyň iň täsirli merkezine öwrülýär. “Älem” medeni-dynç alyş merkeziniň öňündäki meýdançada gurlan Baş Arça, özi bir uly sungat eseridir.Şäheriň her bir seýilgähinde we köçesinde gurlan yşyklandyryş ulgamlary “akylly” tehnologiýalar arkaly dolandyrylyp, gijelerine paýtagtymyzy dürli reňkli şöhlelere boýaýar.Diňe bir Baş arça däl, eýsem, her bir ministrligiň, edara-kärhananyň we ýokary okuw mekdebiniň öňünde özboluşly bezelen arçalar dikilýär, bu bolsa şäheriň baýramçylyk dizaýnyna köpdürlülik goşýar.
Türkmenistanda Täze ýyl dabaralarynyň iň esasy bölegi çagalara gönükdirilendir. Türkmenistanyň Prezidentiniň gatnaşmagynda geçirilýän çäreler we gowşurylýan sowgatlar ýaş nesliň döwlet tarapyndan nähili uly söýgi bilen gurşalýandygyny görkezýär.Döwlet Baştutanymyzyň gatnaşmagynda Baş arçanyň ýanynda çagalar bilen bilelikde geçirilýän aýdym-sazly dabaralar parahatçylygyň we nesilleriň dowamatlylygynyň nyşanydyr.Ýurdumyzyň ähli welaýatlaryndan gelen zehinli çagalar, üçin aýratyn baýramçylyk dabaralary guralýar we maddy hem-de ruhy goldawlar berilýär.Türkmen maşgalasynda Täze ýyl agşamy saçak baýlygy bilen tapawutlanýar. Bu saçak halkymyzyň rysgal-bereketiniň we toprak önümliliginiň görkezijisidir.Dograma, işlekli we palaw ýaly milli tagamlar baýramyň aýrylmaz bölegidir. Emma häzirki döwürde bu saçak dünýä aşhanasynyň iň naýbaşy tagamlary bilen hem utgaşdyrylýar.
Täze ýyl gijesi Türkmenistanyň teleradiokanalary we teatrlary özleriniň iň gowy maksatnamalaryny halka hödürleýärler.Welaýatlaryň arasynda geçirilýän göni ýaýlymdaky teleradiogepleşikler bütin ýurdy birleşdirýär we her bir sebitiň özboluşly baýramçylyk aýratynlyklaryny açyp görkezýär. Teatrlarda çagalar üçin Täze ýyl ertekileri we uly ýaşlylar üçin degişme-pýesalar goýulýar.Dutar-gyjagyň owazy bilen häzirki zaman estrada sazlarynyň utgaşmasy baýramçylyk konsertleriniň bezegidir.
Türkmenistanyň Köpetdagyň eteklerindäki täsirli tebigaty, eger Täze ýylda gar ýagsa, hakyky gyş gudratyna öwrülýär. Gökdere jülgesindäki çagalar dynç alyş merkezlerinde gyşky dynç alyş döwri iň gyzykly oýunlar, typmak we gar adamlaryny ýasamak bilen dowam edýär.
Türkmenistanda Täze ýyl diňe bir şadyýanlyk däl, eýsem, täze belentliklere tarap badalga berýän pursatdyr. Bu joşgun her bir raýatyň kalbynda “Jan Watanym Türkmenistan!” diýen buýsanjy has-da güýçlendirýär. Geçen ýylyň üstünlikleri täze ýylyň täze taslamalaryna, täze gurluşyklaryna we täze rowaçlyklaryna ýol açýar.
Durdyýew Baky
Halkara senagatçylar we telekeçiler uniwersitetiniň Dil öwreniş bölüminiň 121-nji toparynyň talyby
