RU
«Bilim we Ykdysadyýet Akyl güýjüniň önümi» diýen mowzuk häzirki zaman dünýäsiniň ösüş formulasynyň özenidir. Öňler ykdysadyýetiň esasy güýji diňe maddy serişdeler (nebit, gaz, metal) hasaplanan bolsa, XXI asyrda iň gymmatly haryt — bu bilim we adam paýhasydyr.
Ykdysadyýetçileriň pikiriçe, bilime sarp edilen her bir manat geljekde ýurda we şahsyýete birnäçe esse köp peýda getirýär. Bu proses “Adam kapitaly” diýlip atlandyrylýar. Bilimli işçi has gysga wagtyň içinde has kämil we ýokary hilli önüm öndürip bilýär.Diňe bilimli jemgyýet täze tehnologiýalary oýlap tapyp we olary ykdysadyýete ornaşdyryp bilýär.
Bilim ykdysadyýeti — bu maglumatlaryň we akyl güýjüniň önümçiligiň esasy faktoryna öwrülmegidir. Bu ýerde “akyl güýji” fiziki zähmetden has ýokary baha eýedir.Bir barlaghanada tapylan täze madda ýa-da algoritmlik çözgüt äpet zawodlaryň we täze senagat pudaklarynyň döremegine sebäp bolýar. Häzirki wagtda dünýäniň iň uly kompaniýalarynyň (mysal üçin, Apple, Google, Microsoft) maddy binalaryndan has köp, olaryň eýe bolan intellektual çözgütleri we dizaýnlary gymmatlydyr.Sanly tehnologiýalar bilimi ykdysadyýetiň ähli ugurlaryna “tizlendiriji” hökmünde goşýar. Bilim diňe bir uniwersitetlerde däl, eýsem sanly platformalar arkaly islendik işewürlik meselesini çözmek üçin gurala öwrülýär. Bank ulgamynyň we söwdanyň sanlylaşmagy ykdysady dolanyşygyň tizligini we howpsuzlygyny artdyrýar.Ýurdumyzda hem bilim bilen ykdysadyýetiň sazlaşygyna uly ähmiýet berilýär.
Ýokary okuw mekdepleriniň ýanynda döredilýän tehnoparklar ylmyň önümçilik bilen sepleşýän nokadydyr. Bu ýerde talyplaryň ylmy taslamalary göni işewürlik çözgütlerine öwrülýär.”Sanly ykdysadyýeti ösdürmegiň konsepsiýasy” bilimli ýaşlaryň güýji bilen ýurdumyzyň eksportyny artdyrmagy maksat edinýär.
Geljegiň ykdysadyýeti diňe bir gurluşyk ýa-da önümçilik däl, eýsem “akyl sarp etmekdir”. Bilim — bu hiç wagt gutarmaýan we sarp edildigiçe köpelýän ýeke-täk serişdedir. Şonuň üçin hem ylyma we bilime goýulýan üns — bu iň uly we iň ygtybarly ösüş badydyr.
Guwanjow Didar
Halkara senagatçylar we telekeçiler uniwersitetiniň Dil öwreniş bölüminiň 122-nji toparynyň talyby
