«Programmirleme, robototehnika we emeli aň» — bu üçlük häzirki zaman dünýäsiniň iň güýçli hereketlendiriji güýjüdür. Öňler bu ugurlar diňe ylmy-fantastik filmleriň mowzugy bolan bolsa, şu günki ýaşlar üçin olar gündelik durmuşyň, okuwyň we geljekki hünäriň aýrylmaz bölegidir.

​Programmirleme diňe bir kod ýazmak däl, eýsem logiki pikirlenmegiň iň ýokary görnüşidir. Häzirki wagtda ýaşlar Python, JavaScript we C++ ýaly dilleri öwrenmek bilen, sanly dünýäniň gurluşykçylaryna öwrülýärler. Programmirleme ýaşlara islendik çylşyrymly meseläni kiçi böleklere bölmegi we her birine aýry-aýrylykda çözgüt tapmagy öwredýär.Programmirleme arkaly ýaşlar öz oýunlaryny, peýdaly programmalaryny we web-saýtlaryny döredip, hyýallaryny hakykata öwürýärler.

​Robototehnika — bu fizika, matematika we programmirlemäniň amalyýetde birleşýän ýeridir. Ýaşlar öz elleri bilen guran robotlaryna “jan berenlerinde”, ylmyň güýjüni has aýdyň duýýarlar. Robototehnika ylmyň (Science), tehnologiýanyň (Technology), inženerçiligiň (Engineering) we matematikanyň (Math) iň gowy utgaşmasydyr.Robot gurmak we ony ýaryşlara taýýarlamak ýaşlaryň arasynda hyzmatdaşlyk we toparlaýyn işlemek medeniýetini kemala getirýär.

Emeli aň häzirki wagtda tehnologiýanyň iň belent nokadydyr. Ýaşlaryň bu ugry özleşdirilmegi, geljekde dünýäniň nähili işlejekdigini kesgitleýär.Ýaşlar kompýuterlere maglumatlary seljermegi we öňünden çaklamalar etmegi öwredýärler. Emeli aňy öwrenmek bilen birgirt, ýaşlar tehnologiýanyň adamlara zyýan bermän, peýda getirmegi üçin zerur bolan etiki kadalary hem özleşdirýärler.

Ýurdumyzda programmirleme we robototehnika ugurlaryna döwlet derejesinde uly üns berilýär.Ýaş programmistleriň arasynda geçirilýän bäsleşikler we hakatonlar täze zehinleriň ýüze çykmagyna ýol açýar.Mekdeplerde we ýokary okuw jaýlarynda “Sanly bilim” ulgamynyň ornaşdyrylmagy, robototehnika gurnaklarynyň açylmagy geljekki IT-hünärmenleriniň binýadyny tutýar.

Programmirleme, robototehnika we emeli aň — bu ýöne bir gyzyklanma däl, eýsem geljekki dünýäniň açarydyr. Bu ugurlary özleşdirýän ýaşlar diňe bir tehnologiýanyň sarp edijisi bolman, eýsem ony döredijiler hökmünde çykyş edýärler. Innowasion pikirlenýän, sanly tehnologiýalary kämil bilýän nesil biziň “akylly” geljegimiziň hakyky binagärleridir.

Sabyrowa Hurma

Halkara senagatçylar we telekeçiler uniwersitetiniň Dil öwreniş bölüminiň 122-nji toparynyň talyby

DEGIŞLI MAKALALAR:AWTORYŇ BEÝLEKI MAKALALARY: