RU
Biziň ýaşaýan döwrümiz diňe bir tehnologiýalaryň ösýän wagty däl, eýsem hünär dünýäsiniň hem düýpli üýtgeýän döwrüdir. Mundan 20 ýyl ozal ady hem eşidilmedik hünärler şu günki günüň iň köp girdeji getirýän we iň meşhur ugurlaryna öwrüldi.
Eýsem, bu döwrebap hünärler ýaşlara nähili mümkinçilikleri wada berýär?
Döwrebap hünärleriň (meselem: programmirleme, sanly marketing, grafiki dizaýn) iň uly artykmaçlygy — belli bir ýere baglanyp galmazlykdyr.
Ýaşlar Aşgabatda oturan ýerinden Londondaky ýa-da Nýu-Yorkdaky kompaniýalar üçin işläp bilýärler. Diňe noutbuk we internet arkaly dünýäniň islendik künjeginden işlemek we syýahat etmek mümkinçiligi açylýar.Adaty hünärlerde wezipäniň ýokarlanmagy ýyllary talap edýän bolsa, IT we tehnologiýa pudagynda ähli zat bilime we ukyba baglydyr. Iş berijiler diplomdan ötri, edilen işiň hiline seredýärler.
Emeli aň (AI) hünärmenleri, maglumat analitikleri we kiberhowpsuzlyk bilermenleri häzirki wagtda dünýäniň iň gymmat bahaly kadrlarydyr.Häzirki zaman hünärleri ýaşlara öz ideýalaryny durmuşa geçirmäge giň meýdança berýär.Bir ýaş hünärmen öz ykjam goşundysyny (app) döredip, ony millionlarça adama ýetirip bilýär.Döwrebap hünärler diňe bir iş däl, eýsem dünýädäki meseleleri (ekologiýa, saglygy saklaýyş, bilim) tehnologiýa arkaly çözmegiň guralydyr.
Gelejegiň iň geljegi uly 5 hünäri:Ýaşlar näme etmeli?
Döwrebap hünärleriň gapysyny açmak üçin diňe bir isleg ýeterlik däl. Ýaşlar aşakdaky ukyplary ösdürmeli.
Üznüksiz öwrenmek (Lifelong Learning): Tehnologiýa her gün üýtgeýär, şonuň üçin täzelikleri yzarlamak hökmandyr.
Iňlis dili: Sanly dünýäniň dili iňlis dilidir. Ähli täze maglumatlar we gollanmalar ilki bilen şu dilde çykýar.
Çeýe pikirlenmek (Soft Skills): Topar bilen işlemek, kynçylyklardan baş alyp çykmak we kommunikasiýa ukyby.
Döwrebap hünärler diňe bir eklenç çeşmesi däl-de, eýsem ýaşlaryň öz potensialyny dünýä derejesinde görkezmegi üçin iň uly mümkinçilikdir. Bu ýolda iň uly maýa goýum bolsa — özüňe edýän maýa goýumyňdyr.
Kömekowa Gülçemen
Halkara senagatçylar we telekeçiler uniwersitetiniň Dil öwreniş bölüminiň 123-nji toparynyň talyby
