RU
Ynsan döräpdirki, ol elmydama gowulyga, gözellige we parahat durmuşa sary ymtylyp ýaşapdyr. Arzuwlar — bu öňe tarap ädilýän ädimleriň ruhy güýjüdir. Bu günki gün biziň güneşli Diýarymyz diňe bir ýaşaýyş mekany däl, eýsem arzuwlaryň hasyl bolýan mekanydyr. Bu mukaddes toprakda gurulýan her bir bina, amala aşyrylýan her bir özgeriş we gazanylýan her bir ýeňiş halkymyzyň abadan durmuşynyň aýdyň subutnamasydyr.Mundan birnäçe ýyl ozal täsin hem-de amala aşyrylmagy kyn ýaly görünen taslamalar bu gün biziň durmuşymyzyň aýrylmaz bölegine öwrüldi. Galkynyşyň täze eýýamynda Türkmenistan ägirt uly gurluşyk meýdançasyny ýatladýar. Emma bu gurluşyklar diňe bir mermer binalar däl-de, eýsem adamzat arzuwlarynyň miwesidir.
Döwrebap tehnologiýalar bilen enjamlaşdyrylan Arkadag şäheri we beýleki täze obalar — bu ýaşlaryň, bilimli nesilleriň geljek baradaky arzuwlarynyň maddy keşbidir. Her bir maşgalanyň döwrebap jaýlarda ýaşamagy, çagalaryň iň gowy mekdeplerde okamagyna döredilýän şertler abadanlygyň belent duralgasydyr.
Abadan durmuş diňe asuda asmanyň astynda we agzybir jemgyýetde mümkindir. Biz bagtlydyrys, sebäbi biziň ýurdumyzda parahatçylyk we ylalaşyk höküm sürýär. Arzuwlaryň hasyl bolýan mekanynda adam özüni goralan we geljegine ynamly duýýar. Bu bolsa ynsanyň döredijilik ukybyny artdyrýar, ony täze üstünliklere ruhlandyrýar.Döwletimiz tarapyndan amala aşyrylýan ynsanperwer syýasat her bir raýatyň öz ukybyny görkezmegine we arzuwlaryna ýetmegine ýol açýar. Ýaşlaryň iň uly arzuwlary bolan halkara derejesindäki bilim, sport ýeňişleri we ylmy açyşlar şu günki günüň hakykatyna öwrüldi.
Abadanlygyň iň uly ölçegi — bu adamlaryň ýüzündäki ýylgyryşdyr. Arzuwlar hasyl bolanda kalp joşýar, ruh belende göterilýär. Güneşli Diýarymyzda her bir atýan daň — täze bir arzuwyň başlangyjy, her bir ýaşýan gün bolsa — şol arzuwlaryň hasyl bolýan pursatydyr. Nesilleriň dowamatlygy, çagalaryň şadyýan gülküsi we garrylaryň ak patasy bu abadanlygyň iň gymmatly bezegidir.
Netijede, arzuwlaryň hasyl bolýan mekany — bu biziň eziz Watanymyz Türkmenistandyr. Bu mukaddes toprakda her bir ynsan öz bagtyny tapýar, öz arzuwlaryna ýetýär. Abadan durmuş bolsa biziň jebisligimiziň we döwletliligiň iň uly miwesidir.
Goý, arzuwlaryň hasyl bolýan bu nurly mekanynda abadanlyk we bagtyýarlyk baky bolsun! Her bir raýatymyzyň iň asylly arzuwlary nesillere nusga bolup, täze belentliklere tarap ýol açsyn!
Durdybaýew Ryza
Halkara senagatçylar we telekeçiler uniwersitetiniň Dil öwreniş bölüminiň 123-nji toparynyň talyby
