RU
Bagt — bu diňe bir pursatlyk şatlyk däl, eýsem, ynsanyň öz ýaşaýan gurşawyndan, alyp barýan işinden we daş-töweregindäki adamlardan tapýan kanagatlylyk duýgusydyr. Berkarar döwletimiziň täze eýýamynyň Galkynyşy döwründe türkmen halkynyň kalbyndaky bagt duýgusy asuda asmanymyzyň parahatlygy we döwletimiziň gurluşygyndaky durnuklylyk bilen aýrylmaz baglanyşyklydyr.
Asuda asman — bu her bir ösüşiň, her bir döredijiligiň düýp binýadydyr. Adamzat taryhynda parahatçylyk hemişe iň uly gymmatlyk hasaplanypdyr. Eger asman asuda bolsa, adam geljek barada meýilnamalary düzüp bilýär, öňünde uly maksatlary goýýar. Biziň ýurdumyzda parahatçylyk diňe bir syýasy düşünje däl, eýsem, her bir raýatyň durmuş ýörelgesidir. Çagalaryň asuda ukyda bolmagy, eneleriň ýüreginiň ynjalygy asuda asmanyň iň aýdyň miwesidir.Türkmen halkynyň asyrlardan aşyp gelýän pähim-paýhasynda abadan ýaşaýyş agzybirlik bilen utgaşýar. Kalplara dolan bagtyň gözbaşynda şulary görmek bolýar:
Abadan ýaşaýyş ilki bilen maşgaladan başlanýar. Ata-enä bolan hormat, perzentlere bolan söýgi bagtyň özeni hasaplanýar. Adam öz zähmetiniň miwesini görende, onuň kalbynda buýsanç we şatlyk döreýär. Ýurdumyzdaky täze-täze önümçilik desgalary, däne meýdanlary we bagy-bossanlyklar halkyň halal zähmetiniň netijesidir. “Goňşyň asuda — sen asuda” diýen nakyl biziň milli bitewüligimizi we jemgyýetçilik bagtymyzy aňladýar.
Häzirki wagtda Türkmenistanyň her bir künjeginde amala aşyrylýan gurluşyklar we özgerişler “Döwlet adam üçindir!” diýen baş ýörelgäniň aýdyň subutnamasydyr. Ak mermerli şäherlerimiz, häzirki zaman akylly tehnologiýalary bilen enjamlaşdyrylan binalarymyz diňe bir gözellik däl, eýsem, ynsan durmuşynyň amatlylygy üçin döredilýän şertlerdir.Aýratyn-da, ýaş nesillere döredilýän giň mümkinçilikler — döwrebap mekdepler, ýokary okuw jaýlary, sport toplumlary — ýaşlaryň kalbynda öz ukyplaryny amala aşyrmaga bolan uly ynamy döredýär. Geljege ynam bolsa bagtyň iň esasy sütünleriniň biridir.
Kalplara dolan bagt — bu biziň geçmişimize bolan hormatymyz, şu günümize bolan şükranalygymyz we geljegimize bolan belent ynamymyzdyr. Asuda asmanyň astynda, abadan we parahat ýurtda ýaşamak her bir türkmenistanly üçin iň uly baýlykdyr. Goý, biziň asuda asmanymyzda hemişe parahatçylyk guşlary saýrasyn, her bir kalba bolsa egsilmez şatlyk we bagt dolsun!
Maksadowa Gülnäzik
Halkara senagatçylar we telekeçiler uniwersitetiniň Dil öwreniş bölüminiň 123-nji toparynyň talyby
