RU
Dünýäde her bir döredijilik adamsynyň öz syrdaşy bardyr: şahyryňky — galam, sazandanyňky — gural, nakgaşyňky bolsa — ak kagyz. Ak kagyz nakgaş üçin diňe bir iş guraly däl-de, eýsem onuň ähli arzuwlaryny, duýgularyny we dünýägaraýşyny siňdirip biljek çäksiz ummanydyr.
Nakgaş ak kagyzyň öňünde duranda, ol ýerde entek hiç zat ýokdur, emma şol bir wagtyň özünde hemme zat bardyr. Aklygyň tämizligi nakgaşyň hyýalyna ganat berýär. Kagyz — dymýan, ýöne hemme zady diňleýän we saklaýan iň wepaly dostdur.Nakgaşyň galamy kagyza degiren pursady, iki dostuň gizlin söhbetdeşliginiň başlanmagydyr.
Kagyz nakgaşyň goýberjek ýalňyşlyklaryna-da, ynamly çyzyklaryna-da dözümlidir. Ol her bir ştrihi özüne siňdirip, ony taryhyň sahypasyna öwürýär.Nakgaş kagyza diňe bir keşp däl, eýsem jan berýär. Bu ýerde “ak kagyzyň dosty” bolan nakgaş dürli tilsimleri ulanýar:
Grafika (Gara galam): Ak kagyzyň üstündäki gara çyzyklar nakgaşyň iň sada we iň çuňňur duýgularydyr. Bu ýerde kagyz öz aklygy bilen surata “howa” we “ýagtylyk” berýär.
Akwarel (Suwly reňk): Bu ýerde kagyz bilen nakgaşyň arasyndaky gatnaşyk has-da näzikleşýär. Akwarel kagyzy suwy we reňki özüne çekip, dury we dumanly keşpleri döredýär.
Ak kagyz nakgaşyň pursatyny tutup saklaýan guraldyr. Nakgaş bir gülüň açylyşyny, bir adamyň ýylgyryşyny ýa-da tebigatyň ajaýyp pursadyny kagyza geçirende, ol wagt arkaly syýahat edýär. Kagyz şol pursady onlarça, hatda ýüzlerçe ýyllap saklap, geljekki nesillere ýetirýär.
Gadymy mejjitleriň, taryhy binalaryň suratlary saklanyp galan kagyzlar arkaly biz geçmişiň “ynamyny” diňläp bilýäris we ony esere surat eseri hökmünde geçirip bilýàris.
“Ak kagyzyň wepaly dosty — nakgaş” diýenimizde, biz sungatyň iň tämiz formasyny göz öňüne getirýäris. Nakgaş öz kabyndaky nury kagyza dökýär, kagyz bolsa şol nury dünýä ýaýradýar. Bu dostlukdan bolsa hiç wagt könelmeýän we gymmatyny ýitirmeýän Gözellik dünýä inýär.
Annamanowa Enejan
Halkara senagatçylar we telekeçiler uniwersitetiniň Dil öwreniş bölüminiň talyby
