RU
Wagt — durmak bilmeýän, üznüksiz akyp duran deryadyr. Emma şol deryanyň akymyny sähel pursatlyk duruzmaga, bir pursady bakylyga öwürmäge ukyply ynsanlar bar. Olar — suratkeşler. Suratkeş diňe bir reňkleri ulanýan adam däl-de, eýsem wagty kenebiň ýüzünde “bendilige” alýan hakyky jadygöýdür.Günüň ýaşyşyndaky gyzyl öwüşgin, bir adamyň ýüzündäki pinhany ýylgyryş ýa-da güýz paslynyň düşýän ýapragy… Bular birnäçe sekundyň içinde ýitip gidýän pursatlardyr. Emma suratkeş şol pursadyň içindäki gözelligi görýär we ony öz galamy ýa-da çotgasy arkaly kagyza geçirýär.Suratkeşiň çeken suratynda şol pursat ýitmeýär. Onlarça ýyldan soň hem şol pursat edil şol täzeligini saklaýar.
Biz taryhy şahsyýetleriň ýa-da gadymy şäherleriň keşbini diňe bir taryhy kitaplardan däl, eýsem şol döwürde wagty “duruzmagy” başaran suratkeşleriň eserlerinden öwrenýäris.
Suratkeş diňe bir fiziki wagty däl, eýsem ynsan duýgusyny-da wagtyň içinden saýlap alýar. Bir portrete seredenimizde, biz şol adamyň diňe bir keşbinini däl, eýsem onuň şol pursatdaky şatlygyny, hasratyny ýa-da oýçullygyny görýäris.
Suratkeş wagty duruzmak arkaly bizi gahrymanyň içki dünýäsine syýahata çagyrýar.Ýapragyň üstündäki çyg damjasy ýa-da adamyň gözündäki uçgun — suratkeş üçin wagtyň iň gymmatly bölekleridir.
Wagty duruzmak — bu ony diňe saklamak däl, eýsem ony geljege ibermekdir. Suratkeş öz döwrüniň ruhuny, medeniýetini we tebigatyny kenebe geçirip, geljekki nesiller üçin “wagt kapsulasyny” döredýär.
Wagtyň we giňişligiň sazlaşygy-Nakgaşçylyk eserlerine seretmek — wagtyň yzyna dolanyp, başga bir döwrüň howasyny almak diýmekdir.
Suratkeş — wagtyň we gözelligiň sakçysydyr. Ol bize “Saklan, pursat, sen örän ajaýyp!” diýmäge mümkinçilik berýär. Şonuň üçin hem, her bir sungat eseri wagtyň akymyna garşy dikilen beýik bir binadyr.
