RU
Habib Nurmagomedow bilen Fergusonyň arasyndaky köpden bäri garaşylýan söweş koronawirus sebäpli saklanylyp gelinýär. Irlandiýaly UFC söweşijisi Konor MakGregor bolsa bu söweşde Habib Nurmagomedowyň ornuna sekizburçlyga girmäge taýýardygyny aýtdy.
1-nji aprel gününiň agşamy rus çempiony koronawirus pandemiýasy sebäpli Ferguson bilen söweşmekden ýüz öwürdi. Nurmagomedow bilen Fergusonyň duşuşygy 18-nji aprelde Nýu-Yorkorkda geçirilmelidi, ýöne ýerli häkimiýetler söweşi COVID-19 sebäpli ýatyrdylar. UFC-iň ýolbaşçysy Dana Waýt soňky pursata çenli, çempionlyk guşagy üçin dueli geçirer ýaly ýer gözledi. Munuň özi söweşijileriň arasyndaky bu söweşiň guralmagyna päsgel beren bäşinji bökdençlikdir.
“Häzirki wagtda söweşmek üçin ýagdaýym gaty gowy. Ilkibaşda men hiç hili resmi söweş üçin ylalaşygymyň ýokdugyna begendim. Ýogsam, maglumatlaryň yzygiderli üýtgäp durmagy sebäpli söweşe näbelli tertipde taýýarlanmaly bolardym. Ýöne maňa galsa, söweşe çykardym we ýeňerdim” diýip, MakGregor Twitterde ýazdy.
Duşuşyga gatnaşmakdan ýüz öwürendigi sebäpli Ferguson Nurmagomedowy çempionlyk guşagyndan mahrum etmäge çagyrdy.
Irlandiýaly söweşiji garyşyk söweş sungatynda 26 söweş geçirdi, 22 ýeňiş gazandy we dört ýeňlişe sezewar boldy. 36 ýaşly Fergusonyň hasabynda 28 söweş, 25 ýeňiş we üç ýeňliş bar.
