Şugundyryň saglyga peýdasy

Gün nuruny bolluk bilen eçilensoň sahawatly topragymyzda bitýän gök we
bakja önümleriň arasynda derde derman häsiýetlisi köpdür. Şu sanymyzda
peýdaly ösümlik bolan şugundyr hakynda okyjylarymyza ýetirmegi makul bildik.
 Ýylyň dowamynda saçaklarymyzy bezeýän şugundyryň adamyň saglygy
üçin peýdasy köpdür. Şugundyryň düzüminde köp sanly demir, şeýle hem
deňagramly derejede kalsiý we natriý bar. Şeýle-de onuň düzüminde B
topara degişli ýokumlar köpdür. Ýokumlaryň hut şol topary dyrnaklaryň,
saçlaryň berk we deriniň oňat bolmagyna, şeýle hem nerw ulgamynyň
dogry işlemegine täsir edýär.
 Ol düzüminde saklanýan sinkiň we ýoduň mukdary boýunça gök-önümleriň
arasynda öňdäki orunda durýar.
 Şugundyr böwregiň, bagryň, gan-damar ulgamynyň arassalanmagyna
kömek edýär, şeýle hem gan damarlaryň diwarjyklaryny berkidýär.
 Ol bedeniň kesellere garşy göreşijilik ukybyny ýokarlandyrýar, gan
aýlanyşyny gowulandyrýar.
 Onuň düzüminde bar bolan ýokumlar ganazlygy bejermäge ýardam edýär.
Şugundyr iç gatamada diýseň peýdaly bolup, ony içegede näsazlyklar ýüze
çykanda hem giňden peýdalanylýar.
 Ony gipertoniýada ( gan basyşynyň ýokarlanmagynda) hem iýmek maslahat
berilýär.
 Önümiň düzüminde kaloriýanyň az bolmagy ony berhizde hem ulanmaga
mümkinçilik döredýär. Ony buglap iýmek has-da peýdaly.