RU
Golf (iňlis dilinde: Golf) — bu meşhur we asylly sport görnüşi bolup, millionlarça adamy özüne çekýär. Köplenç baý adamlaryň oýny hökmünde görülse-de, hakykatda, golf tämiz howada wagt geçirmegiň, tebigatdan lezzet almagyň we beden-akyl ukybyňy ösdürmegiň iň oňat usullarynyň biridir. Bu oýun tizligi däl-de, eýsem dogrulygy, sabyr-kanagaty we taktiki pikirlenmäni talap edýär. Häzirki zaman golf oýnunyň watany Şotlandiýa hasaplanylýar. Oýnuň ilkinji görnüşleri barada maglumatlar XV asyra degişli bolup, 1457-nji ýylda Şotlandiýanyň patyşasy Ýakow II hatda ony “ýaý atmaga päsgel berýär” diýip, gadagan hem edipdir. Ýöne oýun şeýle bir meşhur bolupdyr welin, gadaganlyk soňra ýatyrylypdyr. Golfuň ilkinji ýazmaça düzgünleri 1744-nji ýylda Şotlandiýanyň Edinburg şäherindäki “Company of Gentlemen Golfers” jemgyýeti tarapyndan işlenip düzülýär. Häzirki wagtda golf dünýäniň ähli künjeginde oýnalýar we 2016-njy ýyldan başlap Olimpiýa oýunlarynyň maksatnamasyna yzyna gaýdyp geldi.
Golfyň esasy maksady örän ýönekeý: topjagazy has az urgy (sok) bilen meýdançadaky bellenen 9 ýa-da 18 sany çukura (hole) salmak. Golf meýdançasynda adatça 18 çukur bolýar. Her çukur üçin ýörite bellenen urgy sany (par) bar (adatça 3-den 5-e çenli). Oýun esasy iki zady talap edýär: kiçijik, gaty golf topy we dürli urgy üçin niýetlenen golf taýaklary (klublar). Oýunçy bir gezekde 14-den köp taýak ulanmaly däldir. Her çukur “tee” diýilýän başlanýan ýerden başlanýar. Oýunçy topy iň uzaga urmak üçin uly taýaklary (woods) ulanýar, soňra meýdançanyň ortasyndan (fairway) we iň soňunda çukuryň töweregindäki ýaşyl meýdançadan (green) kiçijik urgy taýagy (putter) bilen çukura salýar.Golfuň esasy ýörelgesi: “Topjagazy nähili ýatyr bolsa, şol ýerde ur, meýdançany nähili tapsaň, şonuň ýaly goý.” Oýunçylar öz duýgularyna erk etmegi we her bir urga aýratyn üns bermegi öwrenýärler.
Golf diňe bir sport däl, eýsem saglyk we ösüş üçin möhüm çeşmedir:18 çukurly meýdançany tamamlamak 4-5 sagat dowam edip, bu aralykda golfçy 8-11{ km} töweregi ýöremeli bolýar. Bu ýöriş ýürek-damar ulgamyny berkitmäge, agramy kadalaşdyrmaga we umumy çydamlylygy ýokarlandyrmaga ýardam edýär. Golf ugurtapyjylygy, dogrulygy we sabyr-kanagaty ösdürýär. Oýunçy her urgydan öň howany, meýdançanyň ýagdaýyny we topuň injek ýerini hasaplamaly bolýar. Golf aýratyn ahlak düzgünleri (etiket) talap edýär: bäsdeşlere hormat goýmak, dogruçyllyk we ýaryşyň düzgünlerine eýermek. Oýunda köplenç emin bolmaýandygy sebäpli, oýunçy öz jogapkärçiligine bil baglamalydyr. Golf meýdançalary tebigy gözelligi bilen tapawutlanýar. Arassa howada oýnamak psihiki saglyga oňaýly täsir edip, stresi azaltmaga we rahatlanmaga kömek edýär.
Golf sportuň iň çylşyrymly, ýöne şol bir wagtda iň peýdaly görnüşleriniň biridir. Ol ýaşyňa we fiziki taýýarlygyňa garamazdan, ähli adamlara işjeň dynç almagy we durmuşyň gymmatlyklaryny berkitmegi hödürleýär. Türkmenistanda hem golf klublarynyň gurulmagy bu asylly sportuň geljeginiň bardygyny görkezýär.
Sahatowa Aýlar
Halkara senagatçylar we telekeçiler uniwersitetiniň Dil öwreniş bölüminiň 109-njy toparynyň talyby
