Saglyk – Dünýä Baýlygy

​ “Saglyk – dünýä baýlygydyr” diýip ýöne ýere aýtmaýarlar. Pul, şöhrat we maddy gymmatlyklar wagtlaýyn we ýitip bilýän zatlar bolsa, saglyk biziň ýaşaýşymyzyň, işjeňligimiziň we bagtymyzyň dowamly çeşmesidir. Saglyk bolmasa, iň uly maddy baýlyklar hem manysyz bolar, sebäbi olardan peýdalanyp bolmaz.Köp adamlar, ilki bilen, maddy zatlaryň yzyndan kowalaşýarlar. Emma adamyň saglygyny ýitiren pursady, bu zatlaryň baryny yzyna gaýtarmak üçin bermäge taýýar bolýar. Saglygy hiç hili pula satyn alyp bolmaýar. Ol diňe dogry hereketler, özüňe ideg etmek we aýawly garamak arkaly saklanyp bilner.

​ Sagdyn adam erkindir. Ol durmuşyň islendik pursadyndan lezzet alyp biler, syýahat edip biler, öwrenip biler we döredip biler. Kesel bolsa, adamy bir ýere baglaýar, onuň hereketlerini we arzuwlaryny çäklendirýär.Sagdynlyk, adamda täze pikirleri, täze güýçleri döredýär. Ylmyň, sungatyň we zähmetiň islendik ugrunda üstünlik gazanmak üçin ilkinji şert — sagdyn ruh we berk bedendir.Saglygyň ähmiýeti diňe şahsy durmuş bilen çäklenmän, eýsem, maşgala we bütin jemgyýet üçin hem gymmatlydyr.Maşgalanyň bir agzasynyň sagdyn bolmagy, maşgalanyň agzalarynyň ählisiniň arkaýynlygyny we bagtyny üpjün edýär. Sagdyn ata-ene perzentlerine gowy görelde görkezip, olara gowy terbiýe berip biler.Sagdyn raýatlardan ybarat bolan jemgyýet, ykdysady taýdan has güýçli we medeni taýdan has ösüşlidir. Sagdynlyk — bu döwletiň iň gymmatly maýasydyr.

Saglyk bir gezek berilýän sowgatdyr, emma ony dowamly saklamak üçin yzygiderli alada zerurdyr.Saglygyň düýbi dogry iýmitlenmekdir. Bedene zerur bolan witaminleri, minerallary we iýmitleri öz wagtynda we sazlaşykly bermek möhümdir.Gadymy döwürlerden bäri hereket – bu ýaşaýyş diýilýär. Yzygiderli maşklar, arassa howada gezmek we sport bilen meşgullanmak bedeniň daşky täsirlere durnuklylygyny artdyrýar.Beden saglygy akyl saglygy bilen aýrylmaz baglanyşyklydyr. Stresden, gahar-gazapdan daşda durmak, ýeterlik uky almak we durmuşa oňyn garaýyşda bolmak ruhy sazlaşygy saklamagyň açarydyr.Saglyk – bu bir derejäni gazanmak däl, eýsem, her gün saýlap alýan ýaşaýyş ýolumyzdyr.

​Häzirki çalt depginli döwürde, adamlar saglygyny ikinji oruna galdyrmaga synanyşýarlar. Emma, durmuşyň islendik ugrynda, islendik üstünlikde — saglyk iň uly motivasiýa we iň uly hossardyr.

Allanazaorwa Aýgül

Halkara senagatçylar we telekeçiler uniwersitetiniň Dil öwreniş bölüminiň 111-nji toparynyň talyby