9-20-nji martda «Awazada» Hazaryň durnukly ösüşi boýunça okuw maslahaty geçiriler

2020-nji ýylyň 9 — 20-nji marty aralygynda «Awaza» milli syýahatçylyk zolagynda Türkmenistanyň, Azerbaýjan Respublikasynyň, Eýran Yslam Respublikasynyň, Gazagystan Respublikasynyň we Russiýa Federasiýasynyň degişli edaralarynyň wekilleriniň gatnaşmagynda Hazar deňzi institutynyň we Halkara ummanlar institutynyň hyzmatdaşlyk etmeginde «Hazar deňzi — durnukly ösüş we dolandyryş» atly okuw maslahaty geçiriler. Resminama Berkarar döwletimiziň bagtyýarlyk döwründe Türkmenistanyň Hazar sebitinde halkara hyzmatdaşlygy mundan beýläk-de ösdürmekligi, Hazar deňziniň daşky gurşawyny gorap saklamaklygy, sebitde durnukly ösüşi üpjün etmäge gönükdirilen halkara gatnaşyklary berkitmekligi we Hazarýaka döwletleriň degişli edaralarynyň işgärlerini okatmaklygy we olaryň hünär derejelerini ýokarlandyrmaklygy maksat edinýär. Daşary işler ministrligine we Hazar deňzi institutyna okuw maslahatyny talabalaýyk guramagy we geçirmegi üpjün etmek tabşyryldy.