RU
Ene mähri — ynsan kalbynyň şuglasy, özünde älem-jahan sygyp biljek manyny göterýär. Ene mähri şeýle bir güýçli şugladyr welin, ol ynsanyň ýoluna diňe bir ýagtylyk saçmak bilen çäklenmän, eýsem iň sowuk pursatlarda-da göwnüni ýylatmagy başarýar.
Dünýäde her bir zadyň özi barada aýdýan şuglasy bardyr: günüň nury ýeri ýyladýar, aýyň şuglasy gijeleri ýagtyldýar. Emma ynsan kalbynyň iň çuňňur we iň garaňky künjeklerini ýagtyltmaga ukyply bolan ýeke-täk nur bar — ol hem ene mähridir.
Ene mähri gün şöhlesinden hem üýtgeşikdir. Gün diňe gündizine nur saçýan bolsa, ene mähri gije-gündiz, ömrüň islendik paslynda kalbyňy ýyladyp durýar. Durmuşyň kynçylyklary, ýalňyşlyklar ýa-da lapykeçlikler ynsanyň ruhuny sowadan wagty, enäniň birje mähirli sözi, ondan gelýän şol yssy şugla adamyň içki dünýäsini täzeden janlandyrýar. Şol sebäpli hem enelerimiziň ýanynda biz özümizi hemişe iň ygtybarly penada duýýarys.
Ene mähriniň şuglasy perzendiň kalbyna siňende, ol diňe bir söýgi bolup däl, eýsem edep, wyždan we ynsanperwerlik bolup şöhle saçýar. Enesinden mähir gören ynsan, özge birine hem mähir bermegi başarýar. Çünki ene mähriniň şuglasy kalbyň aýnasyny arassalaýar. Şol nur arkaly biz ýagşy bilen ýamany, ak bilen garany saýgaryp ugraýarys. Enäniň “jan balam” diýen sözi perzendiniň ýoluna ömürlik sönmejek yşyk bolup ýazylýar.
Alymlaryň we psihologlaryň pikiriçe, ene mähri iň uly ruhy dermandyr. Stress, gorky we ruhy çökgünlik ýaly garaňky duýgular ene mähriniň şuglasy öňünde durup bilmeýärler. Enesiniň elinden tutan ýa-da mähirli sesini eşiden adamyň beýnisinde “bagt gormonlary” has işjeň bölünip çykýar. Bu bolsa şol mähriň diňe bir simwoliki däl, eýsem hakyky biologik we ruhy şypadygyny subut edýär.Ene mähriniň iň geň galdyryjy tarapy — onuň wagtyň we aralygyň öňünde ejizlemezligidir. Perzent enesinden näçe uzakda bolsa-da, hatda enelerimiz bakyýete gidenden soň hem, olaryň mähriniň şuglasy biziň ýatlamalarymyzda we dogalarymyzda ýaşamagyny dowam edýär. Ol nur bize dogry ýoly salgy berýän sönmez şugla ýalydyr.
Ene mähri — bu biziň içki dünýämiziň iň mukaddes we iň mähirli bölegidir. Eger kalbymyz bir öý bolsa, ene mähri şol öýüň hemişelik ýanyp duran çyrasydyr. Şol şuglanyň sönmezligi üçin bolsa, biz enelerimiziň gadrini bilmeli, olaryň mährine mähir bilen jogap bermeli. Çünki dünýäniň ähli baýlygy enäniň perzendine bakyp, bir gezek mähir bilen ýylgyrmasyna degmez..
Annaduryýewa Mähriban
Halkara senagatçylar we telekeçiler uniwersitetiniň Dil öwreniş bölüminiň 121-nji toparynyň talyby
