RU
Wagt akymy durman öňe barýar, emma her bir döwrüň öz gymmatlygy we geljege goýýan öçmejek yzy bar. Biziň iň uly maýa goýumymyz, iň sarsmaz baýlygymyz bolsa — şadyýan we bagtyýar nesillerimizdir. Halkyň ruhy dünýäsiniň iň aýdyň beýany, jemgyýetiň sagdynlygynyň iň uly ölçegi çagalaryň gülküsinde jemlenendir. Çünki geljegimiz çagalaryň gülküsinde kemala gelýär — bu diňe bir owadan jümle däl, eýsem biziň ýaşaýyşymyzyň, milli döwletlilik ýörelgelerimiziň we dowamatlylygymyzyň iň uly hakykatydyr.
Çaganyň ýürekden gülmegi üçin ol özüni goralan, mähir bilen gurşalan we erkin duýmaly. Ruhy taýdan sagdyn we şadyýan gurşawda kemala gelen çaga, geljekde kynçylyklardan gorkmaýan, döredijilikli pikirlenmegi başarýan we ynsanperwer şahsyýet bolup ýetişýär. Şonuň üçin hem çaga gülküsi geljekki kämil jemgyýetiň gurluşygyndaky ilkinji we iň möhüm kerpijidir.
Psihologik taýdan alanyňda-da, bagtyýar çagalygy geçiren ynsanlar geljekde öz maşgalalaryna we işine has jogapkärli çemeleşýärler. “Täze özgerişlikler mekany” bolan Türkmenistanyň her bir künjeginde ýaňlanýan şadyýan sesler, geljekki alymlaryň, inženerleriň, dünýä tanymal lukmanlaryň we sungat ussatlarynyň ruhy belentliginden buşluk berýär. Şatlyk bilen öwrenilen ylym-bilim bolsa zehiniň has-da ýiti bolmagyna ýardam edýär.
Ýurtda çagalaryň gülküsiniň belentden ýaňlanmagy, şol ýurduň döwlet syýasatynyň dogry we ynsanperwer ýol bilen barýandygynyň iň uly subutnamasydyr. Hormatly Prezidentimiz Arkadagly Serdarymyzyň ýolbaşçylygynda ýaş nesil baradaky alada “Döwlet adam üçindir!” diýen mukaddes ýörelgäniň iň dury mysalyna öwrüldi. Häzirki wagtda täze açylýan “akylly” mekdepler we çagalar baglary diňe bir bilim bermek bilen çäklenmän, eýsem çagalaryň oýun arkaly dünýäni tanamagyna, tehnologiýalar bilen dostlaşmagyna mümkinçilik berýär. Bu bolsa çaganyň ylym älemine şatlyk bilen girmegini üpjün edýär.Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan ynsanperwer işleri her bir türkmenistanly çaganyň şatlygynyň we saglygynyň döwlet ünsüniň merkezindedigini görkezýär. Bir çaganyň saglygyna gowuşyp, ýylgyrmagy — tutuş milletiň ýyldyzynyň ýanmagydyr.
Geljegimiziň çagalaryň gülküsinde kemala gelmegi, biziň milli mirasymyzyň we edep-terbiýe mekdebimiziň hem ebediligini aňladýar. Atalarymyzyň we enelerimiziň agtyk-çowluklaryna aýdyp berýän ertekileri, öwredýän milli oýunlary çaganyň gözýetimini giňeldýär. Çaganyň şadyýan sesi öýüň bereketi bolşy ýaly, ol tutuş milletiň hem ruhy sütünidir.Asuda asmanymyzyň astynda ýaňlanýan her bir gülküde täze bir açyşyň, täze bir üstünligiň we täze bir eýýamyň ruhy ýatyr. Şol gülküler bizi täze belentliklere ruhlandyrýar we geljege has ynamly garamaga itergi berýär. Bagtyýar nesil — bu parahatçylygyň iň beýik miwesidir.
Netijede, çaganyň gülküsi — bu biziň ertirimizdir, biziň ýazjak täze taryhymyzdyr. Eger biz geljegimiziň nurly, kuwwatly we parahat bolmagyny isleýän bolsak, onda çagalarymyzyň şatlygyny, olaryň döredijilik dünýäsini gözümiziň göreji ýaly goramalydyrys. Çaga gülküsi egsilmeýän ýurduň geljegi hemişe aýdyň, mertebesi bolsa belentdir.Goý, güneşli Diýarymyzyň her bir künjeginde bagtyýar nesilleriň şadyýan gülküleri ebedi ýaňlansyn! Çünki şol gülkülerde biziň Berkarar döwletimiziň beýik we lowurdawuk geljegi gurulýar.
Azadyýewa Nabat
Halkara senagatçylar we telekeçiler uniwersitetiniň Dil öwreniş bölüminiň 123-nji toparynyň talyby
