RU
19-njy dekabrda Türkmenistanyň Daşary işler ministrliginiň binasynda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýurdumyza sapar bilen gelen Saud Arabystany Patyşalygynyň daşary işler ministri Faýsal bin Farhan Al-Saud bilen duşuşygy boldy.
Türkmenistanyň Daşary işler ministriniň habar bermegine görä, geňeşmeleriň barşynda ikitaraplaýyn gatnaşyklaryň möhüm meseleleri ozal gazanylan şertnamalaryň ýerine ýetirilişiniň çäginde ara alnyp maslahatlaşyldy. Iki döwletiň arasyndaky gatnaşyklaryň ýokary derejesi, halkara arenasyndaky hyzmatdaşlygyň netijeli ugry nygtaldy.
Daşary işler ministrlikleriniň ýolbaşçylary halkara guramalarynyň çäginde özara gatnaşyklaryň möhümdigini belläp, köptaraplaýyn platformalarda iki döwletiň halkara başlangyçlaryny we tekliplerini yzygiderli goldamak tejribesinden kanagatlanma bildirdiler.
Daşary işler ministrlikleriniň ýolbaşçylary ikitaraplaýyn hyzmatdaşlygyň hukuk binýadynyň esaslaryny, şol sanda iki ýurduň raýatlarynyň bähbitlerine konsullyk goldawyny giňeltmäge taýýardyklaryny tassykladylar.
Söwda we ykdysady gatnaşyklar ara alnyp maslahatlaşylanda, döwlet we hususy gurluşlaryň arasyndaky hyzmatdaşlygyň gerimini giňeltmek, maýa goýum ýagdaýyny gowulaşdyrmak babatda iki ýurduň gyzyklanmasy beýan edildi. Iki ýurduň işewür toparlarynyň arasyndaky gatnaşygy artdyrmak maksady bilen türkmen-saud işewürler geňeşini döretmegiň maksadalaýykdygy bellendi.
Şeýle hem, nebitgaz, himiýa, dokma, haly, raýat awiasiýasy pudagyndaky hyzmatdaşlygy ara alyp maslahatlaşdylar, suw baýlyklaryny tygşytly peýdalanmak we çölleşmäge garşy göreş meselelerine üns berildi.
Mundan başga-da, taraplar 2023-nji ýylda Er-Riýadda geçiriljek söwda we ykdysady hyzmatdaşlyk boýunça hökümetara türkmen-saud toparynyň indiki ýedinji mejlisine taýýarlyk bilen baglanyşykly meselelere garadylar.
Gepleşikleriň dowamynda diplomatlar syýasy gepleşikleri, parlamentara we söwda-ykdysady hyzmatdaşlygy, medeni we ynsanperwer alyş-çalşygy, şol sanda iki ýurduň arasynda maýa goýum taslamalaryny durmuşa geçirmegi güýçlendirmek üçin “Ýol kartasynyň” maddalarynyň durmuşa geçirilmegi barada pikir alyşdylar.
Duşuşykda sebitara we halkara gyzyklanma bildirýän meseleler ara alnyp maslahatlaşyldy.
Kadyr Ataýew
Türkmen döwlet binagärlik–gurluşyk institutynyň
Binagärlik–gurluşyk fakultetiniň talyby
