RU
GUWLAR…
Heý, guwlar,heý sary guwlar gaýduwsyz,
Biziň ilde ýary gören barmydyr…
Gitmäň uzaklara,yza gaýdyň siz,
Söwer ýary ýeke goýan ýarmydyr…
Heý, guwlar,üzmäň siz aralarňyzy,
Üstüňizden geçýän gamgyn bulut deý.
Uzakdan seretmek ýaraly günde,
Ýetip bolmaz uz-owadan bagtdyr.
Heý, guwlar,heý,ýary gören barmydyr,
Bir görmäge zary gören barmydyr.
Içimde uwlaýan hasrat ýelinden,
Yklymlarda gamgyn ýeller barmydyr.
Heý, guwlar,güýz güni merdiwan kibi,
Alyslaryň aýdymyndan gana siz,
Meniň ilim taşlap nirä barýaňyz,
Başga ülkelere,başga ýana siz.
Heý, guwlar,heý ap-ak guwlar,ak guwlar,
Munda göwni söwer ýardan galan bar.
Gül didaryn ömür boýy arzuwlap,
Garaşsa-da ýar arada ýalan bar.
Heý, guwlar,derdimi kime diýeýin,
Gitmäň,gaýdyň yza,yklymlar söke.
Siz meň köýen arzuwlarma çalymdaş,
Siz bir ak matal ýa ap-ak pelsepe.
Heý, guwlar,heý ap-ak guwlar,gaýdyň-a,
Size munda gussasyny diýjek bar.
Gygyryp,sam-sary,gamgyn aýdyma,
Sizde umytlarny tapyp söýjek bar.
Daşlaşyp barýaňyz,sesim ýetenok,
Heý, guwlar,ak arzuwlar,arzuwlar…
Size ýüregimde bir hat galypdyr,
Ýar deýin sesimi eşitmedik guwlar…
GÜÝZ
Bu neneň sarylyk, nähili matal, Ýaprak nirden tapdy, gopup gaçmany. Bulutlaň astynda çaýkanyp ýatan Baglar edil çirkizilen saç yaly.
Söydüm seni sary deňziň damjasy,
Sende däli yazyň porhanlygy ýok,
Saňa içim dökjek diýen gursagym, İndi seret, pyşyrdap hem bilenok.
Sust ümsümlik paýlap ýaganda ýagyş, Çyg çekipdir güýzün altyn ýallary. Ah, kükregi ýanyp duran nätanyş,
Gujaklap çykypdyr, ýaşyl baglary.
GÜÝZ GOŞGUSY
Men giçki güýz hakda köp oýlanýaryn,
Şonda duýgularym bolýar elýetmez,
Şeýdip derrew gyş temasy başlanyp,
Goşgularym çykman galýar, gazetde.
Asman saraýyna barýan bulutlar,
Azaşýar Ýer-gögüň merdiwanynda,
Gussa çümüp sary ýaprak aglaýar,
Güýzüň hasrat bürän ýel-dumanynda.
Şeýdip, kalba salýar sadaja gussa, Hemem süýji, bir düşnüksiz ykbaly. Güýz güni şeýlebir kalba ýakymly, Meniň çap bolmadyk goşgulam ýaly.
BÄŞINJI GATDA ÝAZYLAN GOŞGY
Sowuk köçeleriň ýokarky ýary,
Ak dumanda,şat hyýalda wada berýär,ak gary.
Çendan biri,ýa ikisi,geçip gidýär adamlaryň,
Güýzüň iň soňky sekisi,duman bilen adaglanan.
Kempirmi,juwanmy,çaga,her kimiň derdi sowulan,
Öýkeni dumanlan şary,goýup giden deý,sowuga.
Köçe,duman aralygy,janly ýa jansyz hereket,
Gutardy güýz sarylygy,eräp gitjek ak garda,köp…
ÝODAJYK
Aý astynda ýatan ýalnyz ýodajyk, Ak gijede süýnüp gidýär, yüp ýaly. Bir gowy zadyny halaýan onuň,
Öz üstünden yöretmeýär betpäli.
Bilmedim, kimlerin ýodasyka bu,
Ýa-da gamgyn kişi şöwür çekýärmi? Gök gyrtyjyň aýagymy öl edip,
Gözyaşmyka, gözlerinden dökýäni?
Kän pikir açýaryn, bu ýoda hakda,
Jedelleşip, ýyldyz bary ýylgyrýar.
Birden gussa gaplap alsa kalbymy, Ýodajygyň ýürek tary yrgyldar.
Şeýle pikir edip, ädimlerimi
Diňe ýodajyga basasym gelýär.
Ka gijeler ýodajygy ýüp edip,
Özümi şol ýüpden asasym gelýär.
GAPYMA
Gapym, ýönekeýje demirden gapym,
Sen bilýansiň, diňe meniň bilmeýän,
Hem meniň bu gije yşygmy ýakyp,
Kagyz ýaly owram-owram owradan ,
Ukymyň näme üçin gelmeýänini. Bilýärsiň sen uzak sapardan soňra, İlki gelip, sana salam berýänmi.
İlki saňa, ilki saňa, senden soň,
Özgeleri gidip, özüm görýänmi.
Hany aýt, ezizim, näzik şahyryň
Itden gözelini soraýşy ýaly,
Menem senden duýgularmy soraýyn, Sen dillen hany.
Men uzak ülkede başga gapynyň
Açarny kisämde göterip ýörkäm, Seniň açaryň hem ýöne ýatyrka, Gapdalymda hiç bir zada gerek däl.
Bir uzyn boýly hem gözleri umman,
Manysy ertekiň gahrymany deý,
Bir ýigit geldimi, meni yzarlap,
Ol juda görmegeý, juda görmegeý. Bir ýigit kakdymy demir süňňiňi, Durup, durup pyşyrdadymy, saňa.
Ah demir topraklym, aýdyp bersene, “Gürle” diyip, ýalbardymy ol sana? Demir gapym, aýtsana sen, syrdamdyr,
Saçlarynda barmaklarmyň yzy bar. Geleninde adimleri merdemdir,
Mahir ýodalary dökülip duran.
Yşykdan nur saçýan eziz ýüzi bar. Gerdeni berdaşly üstünden kileň,
Sähraň lälezarlygydyr kükeýän, Omuzlary bulutlaryň watanyn, Sährany göterjek, ýük urup bilseň. Kamys garly ýaýlalaryň aňyrsyn, Söküp, söküp, söküp, söküp gelen ýar.
Maňa intizardyr, saňa intizar,
Bakyşlary akyp ýatan derýadyr,
Şol bakyşlaň merkeziniň içinde, Göz içinde ýyldyz gujak gerýändir. Dury çeşme ýaly kamaty bardyr, Ellerinde maňa ýazan goşgusy. Çemen getirerdi birmahallar-a,
Ýa bu gezek elleri hem boşmudy?
Sözle gapym, neneň-niçik halda ol,
Sözlesen-e ýa-da häzir ýolda ol,
Men taýa gelýärmi şemalar bilen, Ýaşyl göwherini bagra basmana.
Sözle gapym, bir sen şaýat kysmata,
Men garaşaýynmy “Ýaz geler” diýip,
“Ýaz gelende, öýe ýar geler” diýip.
OBA GIDESIM GELÝÄR (Jigim Selbijana)
Meň oba gidesim gelýär.
Güneş çyksa bulutlardan. Aýakýalaň ylgan ýerlem Daş ahyry unudardan.
Şähere sapyp bir ýany,
Barýar obam has ulalyp, Ondaky kel peller indi, Galdy baglyga duwlanyp.
Tawus guşuň ganaty deý,
Murgabyň suwy owadan.
Gojalaň gürrüňni diňläp,
Süýnüp gaýdýar ol obadan.
Meň oba gidesim gelýär,
Aýlanmaga şol ýerlere.
Gözýaşam bilen reňkläp,
Öwlüýäniň germewlerin.
Jiglermiň murty tabapdyr, Ýigit çykypdyr ýegenim. Obaň ýaşulylary bilen
Tirkeşýär indi doganym.
Meň oba gidesim gelýär,
Ýüregim kert-kemer meniň,
Enemleň köçesi meňzeş
Ertekisine enemiň.
Gije çyrlaklaň sesine,
Aýdym ýazasym gelýär meň. Murgabyň mahmal mukamna Bile ýuwaşja hiňlenip.
Ejem bilen gelnejemiň,
Gümür-ýamyryny diňläp
Oturmaga tam kölgede,
Meň oba gidesim gelýär.
Guzy-goýunlaň sesine,
Çäksiz simfoniýa diňläp,
Öňküden on esse beter,
Meň oba gidesim gelýär.
Ýürege ýapyşan gussa,
Aýt obam, haçan ýeňlär.
Gaýtaladygymça şo-o-ol söz:
Meň oba gidesim gelýär.
Durmuş haýran galaýmaly, Gaýtalaýan, sözüm diňläň. Şeýlebir küýsegler bilen,
Meň oba gidesim gelýär.
Obadan gelen ýegenim,
Gapdalymda goşgy diňläp, Taşlap, şäherde doganyn,
Oň oba gidesi gelýär.
MEN-Ä OBA GITJEK
Men-ä oba gitjek,oglumy alyp, Gözellige öwrenişsin gözlerim. Daňdan goňşularyň howzuna baryp, Suw daşajak,nahallarna mellegiň.
…Ejemden soň…alçalar hem garrapdyr,
Gorlanypdyr,dym-dykyzja gölämiz.
Seýrek gelýän aýal doganlam ýaly, Üzümleri selçeňläpdir teläriň.
Ýene-de göwrämi ýorunja busup,
Ot ýygyşyn gaýtalajak enemiň. Sapagny ötürip bermegem lezzet Kölegede,gözi uly temenniň.
Erkek doganymyň sözleri ýaly,
Dünýä mähir bilen haçan bakarka?
Abraýy galamdan gözledim ýördüm,
Başga zady dileg etmän Ýokarka…
Menem säher suw sepjek giň gujagna, Çagalygmy bagra basan howlymyň. Şükür, hiç sönmedik atam ojagna, Mähri siňsin,ulalmaka oglumyň.
Men-ä oba gitjek,dynjymy aljak, Görüp gaýtjak,maňkalyja jiglemmi.
Hemem gyz jigime hünjüjik alyp,
Sag bol aýtjak,hut şol öýde doglanna.
Tämiz saklawersin ejemiň öýün,
Işe gidip gelibersin,gelnejem.
Bäş-on günjük öý işlerni edeýin, Hyzmatymy görsünler goý,meniňem.
Göçgünli kelleler bir mahal ýaşkak, Okamaga äkelipdir,paýtagta. Ýogsa,partygmyzy dakynyp,mäkäm, Giderdik-le okuwdan soň pagta-da.
Men-ä oba gitjek,kölegeli tam,
Hem ejemiň ýerin tutan gelnimiz,
Bäş köçe aňyrda ýaşaýan atam,
Baý islärdi,paýtagtdan gelmegim.
Maňa azar bermäň,men oba gitjek, Güňleç şäher sesden aljak dynjymy. Sähralaň şemalna derdimi daňyp, Şygyr ýazjak,söýgi hakda ünjüli.
Ýol-ýola,il-ile sapanda agşam,
Sygyrlaryň sürä gidip gelşini,
Synlaýyn-la biraz suratkeş ýaly, Agşamara süri obaň gelşigi.
Goňşy gyzlar gözlerini süzüşip, Diýýärler ogluma, “görmegeý ýigit”. Senem ýürek gyssa,gussa ilişip, Şäheri birsellem taşlap,oba git!
Men-ä oba gitjek,şu gün ýa ertir,
Köp boljak däl,gussalarym çogmasyn. Arasynda käte baryp gaýdaýyn,
Eziz obam unutmasyn,dogmasyn.
Gündizki otla-da alyp petegi,
Synlap gitjek,sagy-soly,çar ýanym.
Şonda sähraň seçegine çolaşan,
Bedewler synlasyn,oba barýanym.
Ýaşyl baýyrlaram meniň yzymdan Galgap galsyn müň bir reňkli şal ýaly.
Megerem şemallaň içi gysandyr,
Olaram oňlarlar oba barýanym.
Täsin-le,otlynyň “şuwlap”gitmesi,
Sähraň ruhy kowalasa, yzymdan,
Gül tumarly sähram,närazy bolup,
Öýkeläp galmasyn,şahyr gyzyndan.
Men-ä oba gitjek,gözlem dynç alsyn,
Hem oglan doganym “gel” diýýär “ýygy”. Goý ýüregim derdin döksün,ynjalsyn, Men oba gideýin,alyp oglumy.
IR DÄLMI?
(Jigim Marala)
İr-ä entek iýnse gubar gözlerňe, Gaşlaryňda on ýediniň heseri. Ilki agsam ir dolanyp,oýüňe,
Okap diňe söýgi hakda eseri.
Ýatlamaga iş-güýç bilen unudyp,
Batbörege göwünlermiz daňýanmyz. Ene ýaba tanamaga cuňlugy,
Özumizi goja tutdan zyňyanmyz.
Gelnejemiň kürtesinden ýapyşyp,
Çagalardan gabanyanyň düýn dälmi?
Ir-ä entek,içki jaýda gyslysyp,
Sabamaňyz, O ne beýle, Ir dälmi?
Gyş gelmänkä…
Kämil däl bolarly bu beýik baglar,
Garga geçse hüjjerişýär saçlary.
Gyş heniz nobata goýmandyr
Çemli
Güýz toşabna dalan bu agaçlary…
Bilýänem däldirler aňzagyň baryn…
Adam şeýle bolýar…
Gaty söýende.
Täsin…
Gyş gelende asyljak daryn
Çyrmaşyklar taýýarlaşyp goýanda…
Agaçlar henizem ýaprak dökerne,
Ynanmazdan dowam edýär ýangynyn.
Ezilip damary güýzüň şekerne,
Hamana gelmejek ýaly gamly gün…
Goýalşan mürepbe,
Ýumşak toşabyň
Nobatyny syzyp, süýji gülaby…
Häzir süňňü müdimilik galjak deý,
Göýä häzir başlajak deý bal aýy…
Gargalaň opera aýdyşyn diňläp,
Toprak baş ýaýkaýan mysaly häzir.
Tekiz ýerde büdräp gelýän enem deý,
Güýzüň ruhy gökde hasaly häzir…
Şemal ýekelänok öýsüz itleri…
Gorkusyndan gizlenişýär syçanlar.
Güýz gelse obamyz aňyryk süýşüp,
Uzaklaşan ýaly bolýar ejemler…
Toşabyň ysyna eräp bedenim,
Kimdir birin göresleri gelýändir.
Gyş gelmänkä bilmän näme ederin,
Agaçlar hem hut men ýaly bolýandyr.
Ol heniz nobata goýmandyr çemli,
Agaçlar bukulyp, nyýaza durmaz…
Emma…
Arasynda bölek bulut deý
Geçip gidýär gyş köýnekli…
Sudurlar…
Gün bu gün surata düşýär.
Gün şu gün surata düşýär,
Enjam garaşyp dur oňa.
Gün şu gün surata düşýär,
Suratçy garaşdy daňa.
Sülmüräp çykar sähelden,
Toý lybasy egnindedir,
Gün şu gün surata düşýär,
Günüň ýary eglendi-le.
Ýüzi nurly, çogy artyk,
Asman ak ýol, ýoly artyk,
Ýöräp gelýär, şaly artyk,
Gün bu gün surata düşýär.
Dag- daşlaryň aňyrsyndan,
Gaýmaklan asman gatyndan,
Sorap söýgi Taňrysyndan,
Gün bu gün surata düşýär.
Daň bilen guşluk arasy,
Suratçy köňül parasy,
Beýle güýjüň heý ýary kim?
Gün bu gün surata düşýär.
Ýol beriň gün geleýidi,
Ýar boljaklar öleýidi,
Ýalňyzlygyň täleýidi,
Gün bu gün surata düşýär…
Gyş hem bir ýaz…
Sowuk bolsa bolsun,guşlar saýraýar
Ady bolanda nä:
Gyşlar…
Aýry Ýaz…
Ýakymly ýaryň hem söýýän ýaly has,
Ýyljak pejiň başy,
Tüýs master klass…
Köçeden ýygnanan çagalaň içi
Edil Amstradam deý:
Gysby hem kiçi…
Olaryň ýüregi ýarylyp barýar,
Aýaz için ýakýar penjirä gelip…
Oň dili ýelmeşýär kä daýym aýna…
Ehhh…Bu pursat üçin ölmäge taýýar…
Daşarda dilini çykaryp käte,
Doňan penjirä de ýelmeşip ümsüm…
Sahna: Nagyş ýasap, hem şuwlap çapgyn…
Ähli teatrlaň sahna oýnuny
Bir ýere üýşürip, otlasaň hem bes,
Gyşyň gurnan sahnalarnyň dünýäsin,
Görmäge penjireden edeňde höwes…
Heý… Papagny çümrüp geçýär fonarly
Aýazbaba ha däl, dertli biri ýa?…
Hol ýerde tokaýyň üstünden gaýdýan
Garlar
Häzir ahwaly deý Siriýaň…
Döwük ýaly ähli jaýlar, agaçlar,
Guşlar çeýnäp läle, güjür- de güjür…
Ýeri şol fonarly geçende näme,
Daralyp barýarmy gar basan köçe?
Kölegeler gorkunç,hatar- hatar kä,
Aý halkasy el uzadýar işige
Uffff…
Bu gorky neneň süýji,
Höwürli,
Häzir uçýan ene girýär düýşüme…
Göýä öýjagazam aýakda dur kä
Yrgyldap,
Üstünden gaçaýjak ýaly…
Köçede hiç kim ýok,
Heý kimsiň?..
Kölge!..
Paraşýutym açyk uçaýjak ýaly…
Bar zat ak gar, guşlar saýrap
Heşelle
Kaksa kaksyn, belki biri ýalňyşýar…
Gyş bolsa- da ady Ýaz dek
sahnaly
Şoň adyny biri ýalňyş ýazmyş ýa?
Taňrym…
Çagalary gabama öýe
Ýazdan gözel gyşyň peýiizajy…
Gyş diýseň sowuk ger, gözüň
öňüne
Kim dakypdyr oňa: üşedýän ady?..
Sowuk bolsa bolsun,guşlar
Saýraýar…
Ady bolanda nä: Gyşlar…
Aýry Ýaz…
Gyş gelmänkä…
Kämil däl bolarly bu beýik baglar,
Garga geçse hüjjerişýär saçlary.
Gyş heniz nobata goýmandyr
Çemli
Güýz toşabna dalan bu agaçlary…
Bilýänem däldirler aňzagyň baryn…
Adam şeýle bolýar…
Gaty söýende.
Täsin…
Gyş gelende asyljak daryn
Çyrmaşyklar taýýarlaşyp goýanda…
Agaçlar henizem ýaprak dökerne,
Ynanmazdan dowam edýär ýangynyn.
Ezilip damary güýzüň şekerne,
Hamana gelmejek ýaly gamly gün…
Goýalşan mürepbe,
Ýumşak toşabyň
Nobatyny syzyp, süýji gülaby…
Häzir süňňü müdimilik galjak deý,
Göýä häzir başlajak deý bal aýy…
Gargalaň opera aýdyşyn diňläp,
Toprak baş ýaýkaýan mysaly häzir.
Tekiz ýerde büdräp gelýän enem deý,
Güýzüň ruhy gökde hasaly häzir…
Şemal ýekelänok öýsüz itleri…
Gorkusyndan gizlenişýär syçanlar.
Güýz gelse obamyz aňyryk süýşüp,
Uzaklaşan ýaly bolýar ejemler…
Toşabyň ysyna eräp bedenim,
Kimdir birin göresleri gelýändir.
Gyş gelmänkä bilmän näme ederin,
Agaçlar hem hut men ýaly bolýandyr.
Ol heniz nobata goýmandyr çemli,
Agaçlar bukulyp, nyýaza durmaz…
Emma…
Arasynda bölek bulut deý
Geçip gidýär gyş köýnekli…
Sudurlar…
Uly şäherlerde adam köp bolýar…
Uly şäherlerde adam köp bolýar,
Köp bolýar yşyklar,
Hökman däl duýgy…
Wagt käte dertleriňe dep bolýar,
Gülkünç görünýär bu ýerde söýgi.
Akyp barýan sile dur diýen ýaly,
Bir adamy saklap, salgy sormaak.
Uly şäherlerde kir suwuň ýoly
Açyk ýaly…
Adaty zat: Hor bolmak…
Uly şäherlerde meseleler kän,
Wagt,
Ýer ýok sentimentalizime…
Adamlaň akymna barýan ýalysyň
Welin…
Käte ýöräp barýaň yzyňa…
Ýitirip orentir,Ýoldaşlaryňy,
Özüň ýitip gitseň käte ir bilen…
Uly şäherlerde adam köp bolýar,
Göýä olar bir- birini irizen…
Bu ýerde mähelläň eli jübsünde,
Belki ýarag bardyr, kim biler onda…
Bir adam görmersiň tutup jigsiniň,
Mekdebe äkidip barýan
Elinden…
Bizar bolmak moda ýaly hamana,
Bir- birege seretmeýär adamlar.
Göýä bärde üýtgän ýaly zamana,
Göýä bärden ýiten ýaly,adalga…
Bolsa bolsun,menem barýan köçeden,
Esentanyş ýaly, ýylgyryp hemmä…
Belki- de diýýändir olar içinden:
“Işsiz gezip ýören ,bir akmak, düňle”
“ Heý, nirä barýaňyz? Barmydyr aýbym,
Nansyz galan ejeňizi unudyp…”
Uly şäherlerde adam köp bolýar,
Gaçan ýaly bolýar…
Ähli umydyň…
Olar maňa ünsem berenok käte,
Käte biri, ýa ikisi geň bakýar.
“Wagty ýok adamzat” şeýlemi ýa- da…
Çalt geçip gitmekmi hyýaly hat- da…
Yzyna gaňrylyp kä daýym biri,
Belki- de hüňürdäp, belki düşünip.
Aýdaýasym gelýär: “ Heý men-ä däli,
Aslyňyza siz azajyk düşüniň…”
Aý bolýa- da dymdym,
Belki bularam gelende ýaňradyr,
Edil men ýaly…
Şu ýerde ýaşamak dert çökerýändir,
Olar hem bir mahal açyk dünýäli…
Ejeňi unutmak moda deý bärde…
Aýtmasam-a azar, aýtsam gep bolýar…
Pahyrlaryň özi bilýändirler-dä…
Uly şäherlerde adam köp bolýar…
Aýyňam öz işi bar
Aýyňam öz işi bar,olam garawul gijä,
Aýly gije aşyklaň, näzleri artar- süýjär.
Ýigit hyjuwy güýjär,joşar akar gaýmagy.
Gyzlaň döşüne göçer gyzyl gülleň oýmagy.
Asmanyň o çetinde bulutlary aýy tijär,
Görk berer öňküsinden äleme aýly gije.
Ýelken ýasar-da Taňry bulut ummany ýüzer.
Şeýdip gijeden- gije nur saçar aýly güzer.
Ynsan duýgusy ýüje,
Aýyň söýgüsi ýüje,
Asman bilen adamzat doglan ýaly bileje.
Söýgüniň güýji ýüje,
Söýlenler süýji ýüje,
Soň güýz gelende belli: Sanalar horaz- jüýje.
Gyzlar atarlar bije,
Näzler boş gider nije.
Ahyr aşyk ýigitde duýgy dörär birhiljek.
Soň söýgiň syry başga,
Duýguda gory başga,
Gije ýene akara
Gyzlar geler, aý gaçsa!
Käte gözýaşlar güýjär,
Käte arzuwlar süýjär.
Ýene- de müň näz bilen,
Bulutlar aýy tijär…
Toý başlar, sazy süýji,
Sazlarda nazi süýji,
Şeýdip aşyk arzuwy girer durmuşda güýje.
Nika suwy süýjülik,
Içer ýaşlar süýjedip.
Şeýdip arzuw daňyna badalga bor gijelik.
Guşak çözdiň yşgynda gezer ýaşlar güýç alyp.
Gije owadan gije
Süýje owaldan süýje
Aýyňam öz işi bar,olam garawul gijä.
Peýzaj
Aý kesilen dyrnak ýaly, egrelip, täze dogupdy,
Gije ýyldyzlaň sapagy elindedi, bugdaýlygyň.
Senem, menem gedemlikden doňňara daşa dönüpdik,
Aýrylanlaň şaýady deý, doňup galdy bugdaýlaram.
Nesim ýeller öser- ösmez, salkyndy ýogsa howa- da,
Sejda iýnen agaçlaram, egrelip galdy, sowalda.
Menmi, sen? Bu aýralygyň ýüpünden hiç goýbermedik,
Soňsuzlygyň serhedinde eglenmedik, eglenmedik.
Gaýtdyk şonda gara gije ikä böldük- de meýdany.
Nika toýunda aňk bolan, adamlar ýaly bugdaýlar…
Ýogsa ýel öser- ösmezde, salkynjakdy ýa howa- da…
Galyp bilmän sejdesinden, agaçlar galdy, sowalda.
Asman ýüpünden aslyşan ýyldyzlaň peträn gözünde,
Aýralyk nepes durlady, yşk sesi geldi gyrlara.
Iki göwräň sowalyny çözüp bilmän egrelen dek,
Aýam hut meňzeşdi şonda, kesilen inçe dyrnaga.
Saňa…
Kepände dodaklar ýapma yşgymy,
Barmaklarňy goýup, “dym”diýme maňa.
Kä wagt: “Siz” diýip, käte- de eräp,
Duýgymy çokjalap, “Sen” diýme, maňa.
Keşdäläp, goýupdym adyňy tahýa,
Sejdeläp oýupdym kalbymdan bir ýer.
Sen maňa: “Siz”diýip ýörseň men ahmal,
Öwrenşerin welin, diýäýseň eger…
“Sen” sözüni ýuwaşyrak owazly,
Hem başga älemden heň garyp çala…
“Siz”diýeňde näm üçindir ynjaýan,
Şoň üçin ýalbarýan: “Siz”diýme, maňa…
Ýogsa sylaýanňam bilýän, arada
Köpçülik ýerinde “Siz” diýýäniňem…
Bagyşla ýalbarýan: “Siz” diýme maňa
Sebäbi men bilýän, gizleýäniňem…
Isleseň: “Sen”diýip, azara galma,
Tutma- da adymy köpüň içinde.
Aslynda bir daşlyk duýýan bolarly,
Ýürek sözleşeňde, gepiň içinde.
Bagyşla, ýalbarýan: “Siz”diýme maňa,
“Senem” diýme, ol azara goýsa kän.
Ýürek özi çözer, kim diýmelisin,
Adymy tutubam ýörme, eýse kän…
Ýönekeý ýodajyk
Belki-de beýlebir gözel hem däldir,
Meni munça oda salary ýaly…
Ýöne ömrüň sahaplarna dolaýar,
Zordan ýaza çykan balary ýaly:
Ýaprak ýatyr…
Güýzem geçdi…
Gyş geldi edil aýralygyň hazany ýaly…
Belki- de Mejnunyň öňünden çykar,
Ol dyzyna çöküp, alary ýaly…
Derekler çyzgyç deý durlar hatara,
Käte- de ussadyň galamy ýaly…
Birden- birden soňsuzlykdan ses gelýär,
Ylham perişdäniň habary ýaly…
Käte bir öwüsýär çapgyn,sowuk ýel,
Atanyň ogula gazaby ýaly…
Belki- de diýýändir: Git- de duýup gel,
Ýenäniň perzende azaby ýaly…
Belki- de beýle- de däldir bu ýoda,
Ussat şahyrlaryň ýazany ýaly…
Ýönekeýje bolsa bolubersin ol,
Ejemiň gamlyja gazaly ýaly…
Dylym- dylym edýär gökde bulutlar,
Şu ýodany tapyp ýazanym bäri…
Belki ýene geçer bu ýerden biri:
Meň şahyr ýüregmiň nazary ýaly…
Başgaça mümkin däl eje!
Başgaça mümkin däl eje! Söýmän ekenimmiş bar şol…
Sen meni ýene “Günäsiz balamsyň” diýip garşy al!
Sen eje ahbetin, bilýäň: Gyzyň demi gelmez sensiz.
Kakam meni geçmişdäki suratyna daňyp gitdi,
Ýogsam onsuz, ýogsam onsuz…
Oglanlygym doňup gitdi…
Başgaça mümkin däl eje, “Jiglermiň boýny egilmän,
Dursun” diýdim, kerkaw ýaly…
Gezdim ýördüm, gezdim ýördüm, sag dünýede
Syrkaw ýaly…
Damarlam ýogsa taýakdy,güldüm şol ýansa- da içim,
Sensiz galmak ýeňil iş däl, başgaça mümkin däl eje…
Kesgitlenen ädimlerim, nusga boldy ula- kiçä,
Mümkin däldi undulmagym, Başgaça mümkin däl eje!
Ýokdy göwnümiň awlagy,ýel bilen ylgap geçdim men…
Mejnunyň hyrkasyn basyp, Leýlini üwräp geçdim men…
Duýgulam dartdy- la ýüjä…
Saýhallandym soň kem- kemden…
Başgaça mümkin däl eje, sensiz dünýede kemsinmek…
Jiglermiň elinden tutup, ýörjen etdim, ýörjen etdim.
Özüm lokmamy iýdirip, üst- başlaryn gurjak etdim.
El uzadan zatlaryny alyp berjek boldum mydam,
Başgaça mümkin däl eje,
“Wi ýa- da şol mümkinmikän?”
“Eje, eje,eje, eje, daşymdan aýdasym geldi,
Kemsidildim,kem görüldim,öýüňe gaýdasym geldi…
Emma gözýaşlarym bilen görünmedim ile hijem,
Çaga deý göz- gaşlam bilen, diňledim aglan göremde,
Öýe barýan bolsam gijem…
Başgaça mümkin däl eje, başgaça mümkin däl, eje!
S u d u r l a r (Tapmaça goşgy)
Şemal gorkup agaçlara bukuldy m
Oýnara gelende ýaprakla r ahat,
Itüzümleň gözýaşlary döküld i ndi gözbäbekler
Ýatan deý ýerd e daly gijeleň
Eşidilýär ah y myzganan güýzüň
Duýulýar derd i ndi sust sesinde
Ruhlar göýäk i mişleň ujunda sallanşyp durla r
Oýun y rgala n ahal deý kökle r uhlar bilen bile
Germelşip durlar r ebabyň
Küýsegi çekilýär dar a z galdy gyş bilen güýze wah
Ar a k bolmana
Taýýarlanşyp agaçlar r işdesin buluda ildirip baka
Gitmek üçin göge geremlşip durla r uhlar hem sudurlar
Ryzwan berişip bir birege
Siňip çyrmaşyp durla r ahatlyk ýene- de alýar kalbym y
Z goýupdyr sary köýnek tenind
e derini bilmeýän deý hamana a k kepene
girmejek bolýan ýal y mykly bir bire saralyp, aglap,
bir bolmaga juda öwrenşipdirle r eňk neýlesin häzir
ol ýok toprakd a gzyndan bal dökýän ýaly hamana
kakan sanajyn a rzuw deý ganat dakyp duran şol
gadymky sudrla r ahat- rahat maňa öwrenşip
durla… r…r…r sudurlar
Ejem ýaly…
Dünýede gowy adamlar
Tiz ýaşaşyp geçen ýaly…
Aglasyň gelýär käteler,
Adam görseň ejeň ýaly…
Dymmalyk ýar boldy maňa,
Ýaňralyk hut göçen ýaly…
Gürleseň- dä hut käte bir
Garabagyr ejeň ýaly…
Süýji günleň kölgesinde
Jennet suwun içen ýaly…
Meň uçma düşesim gelýär,
Ejem ýaly, ejem ýaly…
Däli köňlüm uçdy göge,
Sen kapasam açan ýaly…
Sen kakama meňzeş käte,
Kä mähriban ejem ýaly…
Derdimiň intizarysyň,
Dert, sen hem men üçem ýaly…
Sen meniň arym- namysym,
Hem höwürim ejem ýaly…
Düýbi deşikdir girdäbyň,
Biz öňem bir geçen ýaly…
Bile ýatlansak bor soňra,
Kakam bilen ejem ýaly…
Garry Ruh…
Eý garry Ruh,Eleşan Ruh,S:arly Ruh
Hem syrly Ruh,Hem arly Ruh,Janly Ruh!
Käte ünji,Käte jedel,Käte ýaň,
Käte- de ýagyş deý Sust, kiparly Ruh!
Duran duralgaňdan,Ýatan külbäňden,
Käte şat bolar sen,Käte arly Ruh!
Sen nireden geldiň,Barýarsyň niräk?
Manydan tikilen hyrkaňy süýräp,
Armandan ýonulan hasaňmy ýa Sen,
Başga dünýäň syryn jemalna düýrlän?
Geleňde garrydyň, dünýedenem sen…
Geçdiň yşkdan, ýene gülbedenem sen.
Eý syrly Ruh, timarly Ruh, Ýerli Ruh,
Otagaň altyn hem, kümüş hem däldi,
Lokmaň aňrybaşam, iýmişem däldi,
Ýüpek, atlaz ,parça geýmişem däldiň,
Şonda- da dünýede örän barly Ruh!
Sazdan tarly, kölgäň ýarly,Ýa arşdan,
Taňry gatlaryndan, set müň gerişden,
Ýa ýitmiş sen, ýa dogmuş sen, giriş sen,
Iki älem merdiwanyň barmy , Ruh!
Gitmäge gelseňem, gitseň, gelersiň,
Ötmäge gelseňem, dertli tereňsiň,
Ýapmaga gelensiň ýeriň ýamasyn,
Aglasam aglansyň, gülsem, gülensiň,
Tenimde hiňňildik- bady münensiň!
Ýylgyrşyma temen, ajyma küme,
Sen dünýede boýun bolman hiç kime,
Ýazsam, galamymyň ujunda ýene,
Gudrat içre seň keremiň barmy Ruh!
Janly, janly, janly, hem heýjanly Ruh!
Dertlensem keşdäme taýýardyr çotgaň,
Kölgesiz bulutdan bölünip gopýaň,
Men seň gullugyňda ölerin hökman,
Ataşyň göwrämi odun deý ýakýan,
Ymgyr çölde hyrkaň etegin saklan,
Mejnun dälmi seniň dyzyňa çökýän,
Mundan beter ýüksek makam barmy Ruh?
Eý janly Ruh, kemally Ruh, hally Ruh!
