RU
Adam durmuşynyň ähli döwürlerinde terbiýe ilkinji orunda durupdyr. Bu terbiýäniň özeni hökmünde bolsa zähmet, hususan-da fiziki zähmet ykrar edilipdir. Häzirki sanly asyrda, tehnologiýalaryň ösen döwründe, çagalarda we ýaşlarda fiziki zähmete bolan söýgini we höwesi kemala getirmegiň ähmiýeti has-da artýar. Sebäbi zähmet – bu diňe bir maddy gymmatlyk döretmek däl, eýsem şahsyýetiň sagdyn ösmeginiň we ruhy taýdan berkemeginiň esasy şertidir.
Fiziki zähmet, ilkinji nobatda, adamyň beden taýdan sagdyn bolmagyny üpjün edýär. Zähmet arkaly adamyň hereket işjeňligi kämilleşýär, güýç-kuwwaty artýar we saglygy pugtalanýar. Emma iň esasy zat, fiziki zähmet akyl zähmeti bilen aýrylmaz baglanyşyklydyr. Zähmet prosesi adamdan diňe bir güýç däl, eýsem, işi dogry guramagy, gurallary ýerlikli ulanmagy, döredijilikli pikirlenmegi we maksada okgunlylygy hem talap edýär. Şonuň üçin, fiziki zähmete söýgi terbiýelenende, aslynda, işjanlylyk, jogapkärçilik we özbaşdaklyk ýaly häsiýetler hem kemala gelýär.
Fiziki zähmet adamy jemgyýete taýýarlamagyň iň netijeli ýoludyr. Mekdep döwründen başlap, okuwçylaryň ýaş aýratynlyklaryna laýyklykda guralýan zähmet işleri (gurnak sapaklary, mekdepde we öýde zähmet borçlary) aşakdaky gymmatlyklary ösdürýär.Öz eliň bilen bir zat döretmek, materiallaryň we gurallaryň gymmatyna düşünmäge kömek edýär.Köpçülikleýin zähmet çäreleri (meselem, bag ekmek, arassaçylyk işleri) birek-birege hormaty, dostlugy we bilelikde işlemek endiklerini ösdürýär.Fiziki zähmetiň ahyrynda döredilen önümi ýa-da edilen işiň netijesini görmek, adamyň zähmete bolan höwesini artdyrýar we ruhlandyrýar.
Fiziki zähmete bolan söýgini döretmek üçin iň oňaýly usul oýun görnüşinde amala aşyrmakdyr. Körpeler üçin zähmet oýunlary (meselem, gurjak geýindirmek, oýnawaçlary ýygnamak) işe bolan höwesi kemala getirýär. Öz otagyňy arassalamak, egin-eşikleriňi ýygnamak ýaly borçlar jogapkärçiligi ösdürýär. Kakasyna ýa-da ejesine kömek etmek (sadagaý bejeriş işleri, nahar bişirmäge kömek etmek) maşgala agzalygyny we kömekleşmek duýgusyny berkidýär. Zähmet sapaklarynda (tikmek, biçmek, agaç işleri) el hünäriniň inçeliklerini öwrenmek ýaşlaryň geljekki zähmet ýoluna ugrukmagyna itergi berýär.
Häzirki döwürde kämil hünärli, döredijilikli we işine guwanýan şahsyýetleri kemala getirmek möhüm wezipe bolup durýar. Fizika zähmete söýgi terbiýesi, adamyň durmuşa işjeň gatnaşmagyny, sagdyn ýaşamagyny we durmuş wezipelerini ýokary derejede ýerine ýetirmegini üpjün edýän esasy sütündir.
Zähmet – bu diňe bir iş däl, eýsem sagdyn ruhuň we berk bedeniň aýdymydyr!
Begnazarow Orazmuhammet
Halkara senagatçylar we telekeçiler uniwersitetiniň Dil öwreniş bölüminiň 111-nji toparynyň talyby
