RU
Siren gijesi
Sedasyz…
Gijeki geýminde misli,
Siren güli dökülip dur penjirä…
Aý nuruna suwa düşýän deý asla,
Ýary ak,ýarysy mawy hünjüler…
Gözümde gözleriň…
Araçäk ýitdi. Birden ýyldyz süýnüp,
“Heý, siz kim?” diýjek…
Gara hem ýakymly şalyn örtünip,
Ikimize garawul dur, bu gije…
Tämiz, juda tämiz, öte tämiz, bil,
Açan hem açmadyk gunçalaň agzy.
Hünjülerni döküp, aýnaň öňünde,
Aý nuruna çökýär sireniň labzy…
Kämillik hem bikämillik arada,
Gülünden sallançak örüpdir misli.
Demiňde demlerim, ýok oň arasy,
Ysyna garaşan sirenimiz şu…
Boýlaryň ölçegni alan kölge deý,
Süýşüp barýar siren labyzly aýam…
Sen meni goýberme, haýyş goýberme,
Entek aýralyga taýyn däl aýa:m…
Barlygym ýygnasyn gül kokun,
Garaş…
Siren hünjülerniň çümüp içine…
Näzik barmaklaňda saçlarym daraş,
Gül ysyna çümüp gitsin, saçymam…
Ýadama näzimden, aý nur saçýar, bak!
Perdelerin gülden gerip, dalbaryň.
Sejdä inişi deý, Ýaradylyşyň
Bu beýik Ýalbaryş,
Kämil Ýalbaryş!
Aý nuruna gark bolupdyr Ýaşaýyş
Sirenli gijesi suratkeş Taňryň!
Gözleň arasynda çäk bolmaýşy deý,
Demleň arasynda çäk bolmaýşy deý,
Siren köprüsidir belki- de Aňryň!
ÇOPAN GOŞUNDA
Aý tokgasy penjirämden gaýtma hiç,
Kaksa aýnamyzy , “kim soraýar?”diý…
Seniň göwün damarlarňy dartmaz hiç, Çyrlaklaň yşk hakda simfoniýasy.
Zemin aýagyna çolaşan gülden,
Meniň gursagymda çyzgy galypdyr.
Özge ýerde özge üçin küýsegli,
Meň barymda ötülmejek ýazyk sen.
O öňki ýerlerden gaýdarys indi,
Yşgyň ylhamyndan başymyz çaşan…
Gözleň içindäki sazanda kimdi,
Kirpikleň bilinde sozular agşam.
Bu ýerde gurtlaryň darkaşyn gören, Itler döwre gursa, “kim goraýar?”diý.
Bu gije diňe şol hökümin sürer,
Çyrlaklaň yşk hakda simfoniýasy.
Ýarty Aý
Özümem aglaýan, bir sen däl ähyr,
Ýalňyzlygyň elindäki ýarty Aý.
Öňem, soňam bu asmanyň ýüzünde,
Döwlen nika ýüzügi deý bardy Aý.
Öňem alça gül döküpdi şemala,
Bahar syran ýagşyň nemlerin ýalap.
Sensiz menem ýanýan, ynanaý eziz,
Ýolda taýly görsem, yzyma garap…
Öňem, soňam däldi kysmat atyzlaň
Ýürekgysgynç kölgesinden enaýy.
Öňem mellekdäki üzüm dalbary,
Şerap bolup ýuwdy, meň ýok günämi.
Çilleň çetin güljäjekler jähekläp,
Kakamyň ak iti kowup teneçir,
Agşamara äpet Güni itekläp,
Tomus äkidende ymgyr daňa çen…
Men şonda- da seni göresim gelip,
Ýollaryňa hünji düzerdim, eziz.
Soňsuz şol ýollardan “gelersiň” diýip,
Yhlasymdan ünji düzerdim, eziz.
Mawy köl
Gussa çökýär billerine kenaryň,
Mawy syýa akyp gidýär tokaýa.
Kiçijik ikatýok derdi senaly,
Göýä şol dumanda bir hat okaýa…
Gaýgyň gara çyny borly, sypypdyr,
Gazygy şemala çüýrändir belki.
Bir mahallar “sary”diýip tanardym,
Aýralygyň mümkin üýtgäpdir reňki.
Gussa çökýär billerine kenaryň,
Mawy suwda yzy galýar küregiň.
Aýralyga çydam etmedik borly,
Syýasy dökülýän ýaly ýüregiň.
Agşam aý gaçypdyr kölüň üstüne…
Agşam aý gaçyp dur, kölüň üstüne,
aglaşyp dur güjümleriň ejesi,
Agşam aý gaçanda kölaň üstüne,
Tekiz däldi ayň suwdan “köçesi”
Suwdaky aý “ýüzýär”, durýar gökdäki,
Dälmikä ikisi ýa ekiztaýy,
Agşam aý gaçyp dur kölüň üstüne,
Ekiz ýa ekiz däl, aý ekistazy…
Göze ilýär kölýakadan geçdigiň,
Agşam aý gaçypdyr kölüň içine,
Belki- de ýuwdandyr bir ene balyk,
Güjümler kellesin suwa sokýar- da
Goýä suw düýbünde şol aý bar ýalak,
Hereketde dünýäň garaňkylygy,
Belki- de çaprazdyr suwuň aýnasy,
Agşam aý gaçypdyr kölüň içine,
Aý hem gökde ýitiren dek maýasyn,
Ussatlygna şübhesi ýok adamlaň,
Ýek- tük kölýakadan geçýär ötegçi,
Belki- de köl ýygşyrypdyr şol aýy,
Gara – gök atlaznyň bogup etegni,
Kim biler , sowal bi, gözleri çylgym,
Ussat suratkeşiň şöwür gijesi,
Agşam aý gaçypdyr, kölüň içine,
Şondna soň tolkunlar hasam güýjedi,
Şonda- da owadan, şonda- da dury,
Şugla bilen dolduryp sag- soluny,
Agşam aý gaçypdyr kölüň içine,
Kölüň için aý reňkinden dolduryp…
Peýzaj
Ýaşyl kerep ören suwlaň içinde,
Hiňňildik oýnaýan teneçir durka,
Gatyk ýaly bulutlary gysgyja
Salyp şemal serdi gögüň ýüzüne,
Garyň nagyşlary gaýçynyň gyrkan,
Gykyndygy deýin kenarda durdy,
Görünip gidende güneşiň erni,
Köle aý gaçypdy, teneçir durdy.
Sorýan ýaly kölüň içinden aýy,
Suw içýärdi gara möjek öýkeli,
Agaçlaň gülgüne buguna sarap,
Aýy yrap örýärdi bir möý köli,
Hemme zat öňkidi,könedi bary,
Müň ýyl ozal aý gaçypdy bu köle,
Şol teneçir erejek deý ganatyn
Kä batyp- çomuplar aşykdy köle…
Umytsyz söýgi.
Umytsyz söýgüler özboluşlymyş…
Gyz ýaşy geçse- de, gyz boluşlymyş.
Gamy üz, dünýesi ýaz boluşlymyş.
…Ýigidiň görkünde ýassanyp ýatar,
Umytsyz duýgular hatarma- hatar…
Merdana ýigitler erk edip söýgä,
Içine siňdirmiş, umytsyz yşgy…
…Gyzlar gam çekmäge höwesek bormuş,
Ömri perwanamyş,umyt syzyşly…
…Ýagyrnysyn tama berip ulygyz,
Tamasyny tala daňyp, aglanda.
Özgä taý bolmana taýýarlyk görüp,
Umytsyz yşgynyň bagryn daglanda…
…Gelin maşynyna münse- de soňra
Umytsyzlyk münermiş- de ýanyndan.
Gidermiş, şol atgulagy galgadýan,
“Menem äkit!” diýip, gyzyň yzyndan.
Gelnalyjy bilen köçeme, köçe,
Umytsyz duýgular aýlanarmyşyn.
Sygmazmyş daşaryk, sygmazmyş içe,
Käte ýerden göge saýlanarmyşyn.
…Soň guşak çözdide birden göräýse,
Goňşy gelniň biri kürtäň içini:
Bir damja- umytsyz söýgi bormuş- da
Gaçarmyşyn gözden bijaý içigip.
Oglan nämä aglaýanyn bilmezmiş:
“Begenç gözýaşydyr…” oýlarmyş şonda.
Tisginermiş gyz ýaňagny ýyladyp,
Barmaklarna gyzgyn damja gaçanda.
Nika gyýlyp, gije ýigide- gelne
Märeke daganda, galmanda gaýry.
Iki göwräň arasyna sümülip,
Sessizje aglarmyş, umytsyz söýgi…
Oba etýudy
Daň düýbi çyzyldy, ümsümlik oba,
Guşlar gum- guklugyň hyýalna mündi.
Hem tamlaň ýanynda säginip ulag,
Ota- da gidenok aýallar indi.
Asmanyň ýüzünden süýrelýän misli,
Içi ak pagtaly halta- bulutlar.
Öý bikeleri deý taýýar zat iýip,
Indi pişiklerem ýalta bolupdyr.
Mal ýataklardan hem bir ses çykanok,
Gazyk çalşyp, zowzalardyk geçä biz.
Häzir ümsümligiň mukamy akýar:
Asudaja köp gatnawly köçämiz.
Sygyrlar örä- de gidenok indi,
Şowhunly daňdanlar ötäýen ýaly.
Peçlerden tüsseler çykanok indi,
Adamlar hut göçüp gidäýen ýaly.
Ýygym günlerinde iş has köp bolýar,
Belki olar gidendirler atyza.
Häzir asman- zemin arasyn ölçäp,
Derekler çyzgyç deý, durlar hatara.
Şemal yralanok ýaşyl baglary,
Şol müň ýylky oba, pelek gadymy.
Men bagra basýan- da ümsümlik bilen,
Açýan kildi gulplanmadyk gapyny…
… Hany meniň barlygymyň gözbaşy,
Daňdan ot satmaga ugraýan käbäm?
Ýa şoň ýoklugyna gyýylyp senem,
Sessizje otyrmyň mähriban obam?
“Geldiňmi?” diýýärmiň şahyr gyzyňa?
Sen näme üçin dymýaň, bir sözle ahyr.
Ýa geçen günleriň çöküp dyzyna,
Küýseýäni üçin müýnlimi şahyr?
Hiç tapmadym jogap, köne tanşym dek,
Imrindim obadan çykýan atyra.
Göýä ýaşlymyň ölçegi bolup,
Derekler çyzgyç deý durlar hatara…
Aýly etýud
Bulutlar çykaryp, aýy öýünden,
Çykaryp öýünden, çykaryp gije.
Orun berdi alça agajy bir dem,
Hem berdi puryja,
Hem atdy bije.
Ýer torundan örülipdir agaçlar,
Baharyň syýasy gutaran misli.
Alça güllerini sergiläp asman,
Otyr aýdan nur dökülmegin isläp…
… Ol hem öýünde däl, öýünden hem däl,
Öýünden hem çykyp gaýdan bolarly.
Çykyp gaýdan, ýakyp gaýdan bolarly.
Alçaň düýbündäki ýapraklaň erkin,
Söküp gaýdan, söküp gaýdan bolarly.
Bu gün ýok bolsa- da tapman gaýtsam hem,
Ekip gaýdan, ekip gaýdan olarny.
Gursagyma ajap aýdym saz bilen,
Patrak aýdym, patrak heňler garylyp,
Patrak dodak aýdym aýdan bolarly.
Näme üçindir alçalaryň başynda,
Patrak däl- de dürli hünji galypdyr,
Görnenok
Şonda- da onuň daşynda
Senden baky, baky ünji galypdyr.
Asman düýbi elýetmesizlikdir ýa,
Ýa ýeriň süýdüne agzy ýetmändir.
Alçabaşy düre açylmak üçin,
Ýeriň mähri- garabagry ýetmändir.
Ussadyňa gurban, ussaňa gurban,
Çyzgyç deý ölçegli ykbala gurban,
Müň direldip, müň bir ýakýana gurban,
Käteler atylyp, çykýana gurban.
Ýene öýünde däl, öýünden hem däl,
Öýünden hem gamgyn çykýana gurban.
Ussadyňa gurban, köňülde gurýan,
Köňülde gurulan adyňa gurban.
Patrak döküp, aýy öýünde goýman,
Höwür beren taýsyz zadyna gurban.
Üst adyna gurban, dadyňa gurban,
Müň gulakdan saýlap, müň heňden saýlap,
Diňe maňa aýtjak zadyňa gurban!
Soň…
Gije aý astynda süýrelen bulut,
Ýeňiş bilen gündogara aşdy soň…
Meniň sensizligme haýpym gelmedi,
Saňa bolan duýgylarym öçdi soň.
Soň leýliler gije golun uzatdy,
Akarlaň gyrasyn salgylap saýa.
Bahar nagyş dökdi gülgüne sähra,
Ak güller meňzedi süýtli piýala.
Bilýäňmi, apreliň aýaklarydy?
Şeýlebir şo günler kebelek ýagdy.
Alyslarda biri aýdym aýdardy,
Bal ýataklaryna gatnaw köpeldi,
Göýä sähra balarylaň paýtagty.
Seni halaýanmy bilipjik durduň,
Süýji sözleriňe höwrügenimi,
Asmandan ganar deý süýrenip barýan,
Bulutlaň yzyna öwrülenini…
Bilmeýän zadyň- a ýogam ýalydy,
Akyl bilen barjam bardy, öçdi soň…
Sähralaň gündizki şowhuny ýatyp,
Şo gije bulutlar yza geçdi soň…
Aýyň ýaňagyndan dişläpdir biri…
Aýyň ýaňagyndan dişläpdir biri,
Megerem şol pursat alma saýandyr.
Ýa- da bir mahallar söýüp bir gyzy,
Ýüreginde belki arman galandyr.
Aýyň ýaňagyndan dişläpdir biri,
Şu gün bir azajyk gaçypdyr gelşik.
Ýa soňky günlerde idelmändir şol,
Daşyndan undulan top ýaly ýemşik.
Ýüzünden müň ýoda barýar ýaňaga,
Käsi kerwen geçen ýol ýaly çatak.
Ýa gije ýassykda gyşyk uklapdyr,
Dünýäni duýmandyr,
Ýa şol has ýatak…
Garaz ýaňaklary dişlenen ýaly,
Şu gije görnüşi üýtgäpdir aýyň.
Ýogsa syýadan deý çogup ýatyr ol,
Söýülmäge mynasyp ol, bitaý ol.
Megerem şeýledir, bilýän däldiris,
Ony deňän bolýas bagtly birine.
Aýyň ýaňagyndan dişläpdir biri,
Hyjuwlarna çydam etmän,iribem.
Ol häzir şeýlebir ýalňyz görünýär,
Özüni hiç kime dözmeýän misli.
Biz ony gül ýüzli gyza meňzedip,
Onuň gussalarny duýmaýarysmy?
Bilmedim, näme üçin gädilipdir ol?
Özem täze ýaňakdaky gädigi.
Şonda- da gussasy ýetik görünýär,
Aýyň ýaňagyndan dişläpdir biri…
Aýyň ýaňagyndan dişläpdir biri…
Peýzaj
Aý kesilen dyrnak ýaly, egrelip, täze dogupdy,
Gije ýyldyzlaň sapagy elindedi, bugdaýlygyň.
Senem, menem gedemlikden doňňara daşa dönüpdik,
Aýrylanlaň şaýady deý, doňup galdy bugdaýlaram.
Nesim ýeller öser- ösmez, salkyndy ýogsa howa- da,
Sejda iýnen agaçlaram, egrelip galdy, sowalda.
Menmi, sen? Bu aýralygyň ýüpünden hiç goýbermedik,
Soňsuzlygyň serhedinde eglenmedik, eglenmedik.
Gaýtdyk şonda gara gije ikä böldük- de meýdany.
Nika toýunda aňk bolan, adamlar ýaly bugdaýlar…
Ýogsa ýel öser- ösmezde, salkynjakdy ýa howa- da…
Galyp bilmän sejdesinden, agaçlar galdy, sowalda.
Asman ýüpünden aslyşan ýyldyzlaň peträn gözünde,
Aýralyk nepes durlady, yşk sesi geldi gyrlara.
Iki göwräň sowalyny çözüp bilmän egrelen dek,
Aýam hut meňzeşdi şonda, kesilen inçe dyrnaga.
Aýyňam öz işi bar
Aýyňam öz işi bar,olam garawul gijä,
Aýly gije aşyklaň, näzleri artar- süýjär.
Ýigit hyjuwy güýjär,joşar akar gaýmagy.
Gyzlaň döşüne göçer gyzyl gülleň oýmagy.
Asmanyň o çetinde bulutlary aýy tijär,
Görk berer öňküsinden äleme aýly gije.
Ýelken ýasar-da Taňry bulut ummany ýüzer.
Şeýdip gijeden- gije nur saçar aýly güzer.
Ynsan duýgusy ýüje,
Aýyň söýgüsi ýüje,
Asman bilen adamzat doglan ýaly bileje.
Söýgüniň güýji ýüje,
Söýlenler süýji ýüje,
Soň güýz gelende belli:
Sanalar horaz- jüýje.
Gyzlar atarlar bije,
Näzler boş gider nije.
Ahyr aşyk ýigitde duýgy dörär birhiljek.
Soň söýgiň syry başga,
Duýguda gory başga,
Gije ýene akara
Gyzlar geler, aý gaçsa!
Käte gözýaşlar güýjär,
Käte arzuwlar süýjär.
Ýene- de müň näz bilen,
Bulutlar aýy tijär…
Toý başlar, sazy süýji,
Sazlarda nazi süýji,
Şeýdip aşyk arzuwy girer durmuşda güýje.
Nika suwy süýjülik,
Içer ýaşlar süýjedip.
Şeýdip arzuw daňyna badalga bor gijelik.
Guşak çözdiň yşgynda gezer ýaşlar güýç alyp.
Gije owadan gije
Süýje owaldan süýje
Aýyňam öz işi bar,olam garawul gijä.
SURAT
Bu bahar syrymyz paş boldy gijä…
Dökän-saçan ýyldyzlaryň içinde, Gözlerime garap, sözleriň süýjäp,
Hiç syrylmaz dert galdyrdyň içimde.
Söze erk edemde, dodagym ýapdyň, “Bilýän…” diýdiň, düşünipdiň sözlerme,
Bu bahar syrymyz gizläp bilmedik,
Ýetişmedik ýaglyk daňyp,“gözdaňdy“ Oýnamaga, ýyldyzlaryň gözlerne…
Bu bahar syrymyz paş boldy gijä, Leblerimden dökülende bal suwy…
Sallanjyrap depeden Aý gelinçä,
Hem yşgym aglady çäksiz gam syzyp…
Bu bahar syrymyz paş boldy gijä,
Ýyldyzlaň gözleri açyk daňa çen.
Bu bahar ýene-de syrymyz süýjär,
Arşdan gelýän yşgym ýaýrar ýaňa çen…
Bu bahar syrymyz paş boldy gijä…
Asmandan syrygan perde galgady.
Yşgyň howry göwräň daşyna güýjäp, Ygtyýarmyz bu zeminde galmady…
PEÝZAŽ
Aý depderin köl üstüne
Taşlap goşgy ýazyp ýatyr.
Tylla ýally bedew ýaly, Akasiýa „gazykda“dur.
Ýaplaň ýaşyl gaýmagyna
Tylla aýdan tor düşüpdir.
Kiçijik kümüş balyklar,
Sowuk suwa öwrenşipdir.
Mermerdenmi ýyldyzlaryň,
Sowuk teni,ýyly teni. Ümür çöken çola kenar,
Yşga itekleýär meni.
Kamys güller gadym kölüň,
Hol çetinde,dulunda dur.
Yaşyl kereplikler içre,
Dökülip dur aýdan ak nur.
Ýar gelermi ýaýlalara,
Guşlar kah-kah urarlarmy?
Ýene öňki ýaly gazlar,
Kölde ganat gererlermi?
Asman bulut,ýyldyz ýanýar,
Daş-töwerek nurdan ýanýar.
Ýürek welin ýardan ýanýar,
Kalby kalba meňzeş agşam.
Astral
Heeeýý! Elleriň bitmesin hool öwrümden,
Daňmasyn alnyňa ejeň gara şal!
Taňry günlerini çugdam öwrenip,
Men seň meni derelderňe garaşýan!
Barmaklarym howaň eşigin ýyrtyp,
Gidip barýar!
Hool Ýermi ýa başga zat?
Sen kapasam açan eýämsiň hernä,
Hut şu ýerde mende Sen başlanýaň!
Örküni ýitirdi zemin gijara,
Gözýaşlarym el şalymda bir nagyş,
Biz daly- bedeni- seret-Gün-çynar,
Bu täsin gudrat ya nepis Gurnalyş!
Ruhum içre uçup barýar seň ysyň,
Ýazygy nä ýakynlaryň ýatlaryň!
Polotnosy taýýar taňryň düýşi sen,
Manysy ýok başga- başga zatlaryň!
Yşgymyň ysy sen,
Deşdiň megerem,
Yşgyň dömüp duran Antik gatlagyn!
Ýanyňa ýuwaşja süýşýän ýene- de
Göýä köpüklerni saklan okean,
Gel uçaly!
Wagt kän- ä Güne çen
A sen… Moral okaýaň…
Ah moral okaýaň…
Moral okaýaň…
Şejeräm nirede? Ýok,barýan çykyp,
Uzyn sapak bulutlaryň bilinde.
Göýä gyşarypdyr ýüregmiň oky,
Seniň eliňde…
Göçüp barýan seň ýanyňa az pursat,
Sumruglar perini ýazmaýar, gam ýok!
Ikimiziň içimizde bir Gün bar,
Şoň üçin ölçegni ulaldýar Daňlak!
Gorkýar ýeri galar öýdüp ol, haňlap.
Gorkma! Ol bärde!
Heýýý Daňlak! Daňlak!
Aýa köl gaçypdyr
Aýa köl gaçypdyr,dökülip soňra,
Agaçlaryň şalpy- şaram üst- başy.
Käbiri plaşly ýaşyl matadan,
Ýalaňaç hem gompy agaçlaň käsi…
Köle aý gaçypdy, bolşy ýaly däl:
Aýa köl gaçyşy şeýlebir täsin…
Ikisi ykbaldaş, ikisem ýesir:
Belki olar orýandyrlar pelsepe,
Birden tulumlary deşilip aýyň
Agaçlary ýuwdy, eýse ýuwjak kim?
Aýa köl gaçypmy? Ýa Aý şo köle-
Dünýe haçan dörändigni öwrenýän.
Bu soragym hem gadymy hem köne
Näçe öldürseler , täzeden dogýar.
Aýa köl gaçypdyr, saraldýar gögi,
Köl şeýlebir rahat aýyň içinde,
Bagjyklarny çözseň, gaýtjak ol göni…
Allany çagyrýan , durman içimden….
Köle aý gaçypmy?
Aý köle gaçdy?
Ikisi tapyşdy güýjüň halkasyn.
Duýman geçip gidip bilerdim munam,
Şükür bu zatlary syzanma munda,
Sydyran şol ussa Taňryýalkasyn…
Galtaşma
Özgäniň bagtynyň ysy ýaly hut,
Geçirip köňlüme gyzgyn halkany.
Siren güli tüsse ýaly burugsap,
Aşyryp barýar hut, erjel AŇKAŇY…
Tukatlylaň ýasy ýaly bir maýyl,
Hem şahyrlar ýaly bärden däl,kysmy.
Tütün galýar şol fonaryň üstünden,
Siren burugsaýan bir gazan misli…
Ýesir düşýär şemal gül ýapragyna,
Saçyny penjeläp, aglaýar şu hal…
Şol siren müň ýyl hem şu ýerde däl- de
Adamlary gelmejek deý aldaýar…
Atynýar ol ýesir düşen şemalyň,
Seçeginde gotaz baglan şalyny…
“Ikimiziň aramyzda ýok serhet,
Mähribanym meň üçin bir aglama”
“Bu pyşyrdy kimiňkikä?”şübheli…
Soraglarym ýalan ýaly hamala,
Yrap görýän siren baldagyn tutup,
“Goýber” diýýän, goýbermeýär şemaly…
Hamala şemalda görkezýär nusga-
Meň şahyr köňlümde ary bar ýaly…
Şemal şeýle bendi, şeýlebir tussag,
Dilik- dilik hyrkasynyň ýakasy.
“Men bärde” hamsyrgyp aglaýar biri-
Aýralygyň heýkeli deý bilniksiz,
Hem gadym dünýeden ary bar ýaly…
“Ysyňa ýesir men, şemaly goýber,
Etmeli işi bar, menziller sakly…”
Hol ýokarky tonda müňzeýär biri,
Siren alyp barýar çaşyryp AKLY…
Näme etsemem goýbermeýär etegin,
Ýesirni ezmeklik lezzetli borly,
Ysyna burugsap, çygjarýar tenim.
Şemalyň hyrkasy gülgün gotazly.
Birden şemal kakaýar, bir siren ysy…
Ikisiniň dawasyna şaýat men,
“Goýber siren, şemal atyn , goý gitsin,
“Ikimiziň aramyzda körüň ýok,
Gije düşdi, şygryň ýaz- da bar ýat Sen…”
Hakly şemal,gitdim daňa çen oýa,
Siren goltugyndan çykarýar bir zat,
Öldüripdir şemal – söýgüsin bogup,
Siren heýhaaat, şemal heýhaat,
Jan heýhaat…
Ikiňiziň araňyzda bir şaýat,
Galtaşma bolmasa, neýlesin şemal?
Galtaşma bolmasa, güllärmi siren?
Şahyr nirden ýazsyn şygyr öýmesin,
Şoň üçin kokdugyň bal dälmi , siren?
Sessiz, sedasyz hem maýa bataňda,
Ysyň şemal äkitmese, gül düze,
Galtaşma bolmasa, atyny münüp,
Tutdyrmydy şemal ysyň pürkmäne,
Peleklere, yklymlara, gül- düze?
Galtaşma bolmasa, bormydy heýjan?
Galtaşmalar ýeriň ýüzünden gidýär,
Galtaşmasyz dünýä dünýämi, HEÝHAAAT!
Siren hem şemal
Gülgün duman göterlende giç öýlän,
Howlyň erňeklerne örülip şemal.
Göýä gyz näz edýär, gürleýär oglan:
Burugsaýan güle dirilik berýär…
Aýlanyp gelipmiş depe- dag- düzi,
Görmänmiş siren deý, bir näzli “ýary”.
Ýokmuş siren ýaly,
Başga hiç gülem,
Gülgün bug çykarýan hut siren ýaly…
Labzy şirin, barmaklary haýatda,
Güllere örülmiş gülgüne hünji.
Siren käte- käte uludan demin,
“Alyp burugsanda- duman narynjy…
Aýlanyp gapysyn, penjire, üçek,
Baryndanasoranmyş siren gülüni,
Hut häzirem tutdyraýsa, üm- düze,
Gitjekmiş ol al- asmanda bölünip…”
Şeýlebir owadan, şeýlebir nakys,
Şemalyň aýdymy ýa- da goşgusy…
Göýäki sireniň başynda nagyş
Dökülip dur gumak howla, “bus- busy…”
Giç öýläne çenli okady moral,
Şemal süýdün emdi narynç baglaryň,
Burugsan tüssesin başyna sorap,
Gitmek üçin bogup durka ýaglygyn…
Siren näziklikden akyp hut ýere,
Monjuk ýaly güller serdi etegne…
Şemal hyrkasyny süýräp büdredi,
Hyrkasynyň güli çümen etegne…
Narynç tüsse çykýar, göýäki halka,
Howlyň erňekleri egbardy şala,
Yzyndan “ylgaýar” siren gülleri
Hyrkasyndan gül dökülýän şemaly,
Indi giden wagty tanaýan ýaly…
Gitdi, gaýtalanmaz, gelmezem indi,
Yklymlarda oluk- oluk işi bar…
Sireniň gülünde gözýaş göründi…
Hyrkaň eteginden entegem güller,
Şo-ol dökülip barýar, dökülip barýar…
Ýene….
Ýene aý gaçypdyr, azaşypdyr ol,
Aralaşyp kölüň belent, pesinde.
Agşam az gaçypdyr abanşyp duran
Agaçlaň bulutlar ilip, gerşine…
Ýat gülleler topugyny deşen dek,
Syzylýar suwlary kölüň erninden.
Göýä alakalaň hini meňzeşip-
-suw akýan deý üşäp, aýyň burnundan…
Juwan hemem gödek ýaşlygmyň içi,
Hem ýiten söýgisi gazylgy ýaly.
Agşam aý gaçypdyr kölüň üstüne,
Ejemiň gyňajy ýazylgy ýaly…
Agşam azaşypdyr, azalyşypdyr,
Güjümleň üstünde garga: ýer kändi.
Agşam saňa yşk deý garaşyp duran
Bir syr bolup, ýüregimi ýelpärdi.
Agşam aý gaçypdyr, aý aşypdyr hut,
Degresinde asman çalam- çaş ýaly.
Göwnüm bilen göwnüň garylypdyr hut,
Ikimiziň aramyzda ýok ýoda,
Köňül nädip bilsin, hetden aşýanyn.
Yşga düşen ýürek düşýär köp zada,
Agşam azaşypdyr, azalyşypdyr,
Aý aşypdyr ýürek gämiň ujundan.
Hat-da köl yşkyna erk edip bilmän:
Syzdym, arasynda agyr ýuwdundam…
Ýene aý gaçypdyr
Ýene aý gaçypdyr, aý gaçyrypdyr
Göýä tylla halka, kölüň içine.
Köl häzir hut meňzeş, başşak düňderlen,
Heser bilen barýan düýäň göçüne…
Suwotylar ýarym syýa reňkinde,
Tylla ýüzük halkalaýar boýnuny.
Kim bilip dur, halyk? Balyk? Suw pürkýän…
Eşretiň oýnumy? Aýşyň oýnumy?
Ýöne kölüň reňki açyk öňküden,
Ýene aý gaçypdyr, aý gaçyrypdyr
Bilindäki şaly , süňňü söken deý…
Inçejik çyrmaşyk näz eçilip dur,
Girjek bolup suwuň beýik sütünne…
Deňiz aty torbasyndan çykaryp,
Nämedir bir zady köpürjikledýär…
Gurbagalar görjek bolup dyzaşyp,
Bir- biregi suwuň içine itýär…
Eý- wah pelek! Janl- u – jansyz ählisi,
Ýüpüni çekipdir, ýaýlajak ýaly.
Bir tukat hyýally görmegeý ýigit,
Kenarda doňup dur, aglajak ýaly…
Aý gaçypdyr, gaçyraýypdyr ýüzügin,
Belki- de halkasyn gulagyndaky…
Suw pyşdyly ganatlarny galgadyp,
Ýüzýär göýä atgulakly gelnalyjy,
Gözleri yşygy ulagyndaky…
Eý-heý dünýe aşyklarda aryň bar,
Agşam aý gaçypdyr, düňderlip tümlik.
Kölüň içi apy- tupan durşuna,
Näme üçindir kölüň daşy ümsümlik?
Aý gaçypdyr, aýy gaçyran kimkä?
Ýa- da men agzymy açyp hol göge
Bakyp durun, göýä aý beýik hüňkär.
A men barlygymyň ýanynda duran,
Geçmişimi öwrenýän bir gögele!
